Metallurgie
Dit artikel is gesjreve (of begós) in 't Sint-Joasters. Laes hie wie v'r mit de versjillende saorte Limburgs ómgaon.
Metallurgie (Aadgrieks: μέταλλον métallon "metaal, erts", oarsprunkelik "mien, (stein)groof" en ἐργον ergon "wirk") is de praktiek en de weitesjap óm ertse te vinje, winne en bewirke toet e metaal. De weitesjap is e deilgebied van de matterjaalkónde det zich besjeftig mit de studie van de netuurkundige en sjeikundige gedraginge van de metale en häör mingsels, de legeringe. 't Deilgebied extractiev metallurgie wuèrtj sómtieds ouch kórtewaeg "metallurgie" geneump en besjeftig zich mit 't winne van metale oet ertse of aafvalstruime.
In taengestèlling toet anger ingenieurs bestudeertj 'ne metallurg d'n invlood van de samestèlling en de behanjelinge op de microscopische structuur van metale en van de structuur op häör eigesjappe. 'ne Metallurg bestudeertj de structuur die te gróndjslaag ligk aan de specefieke eigesjappe die de mechanische, lektrische of boewkundigen ingenieur nuèdig haet. De technieke veur de structuur te bestudere waere metallografie geneump.
Me wiltj oetènjelik de volgendje eigesjappe bereike:
- Mechanische eigesjappe (wie trèksterkdje);
- Corrosiebestenjigheid (wie bie rósvas staol);
- Lektrische eigesjappe (wie de geleibaarheid van alleminium en kaoper).
Technologisch behels de metallurgie versjillige stege, nao de winning van 't erts toet de perductie van e broekbaar veurwirp.