Maria Visitatie
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Maria Visitatie of Maria Bezeuk ies 'ne katholieke fièsdaag dae gevierd weurt op 31 mei. In 't Latien neump me dit In visitatione Beatae Mariae Virginis. Me gedènk dan 't bezeuk van Maria aan häör ouwer niesje Elisabeth, dat besjreve weurt in 't Evangelie volges Lucas (1, 39-56). Maria ies op 't moment van 't bezeuk zjwanger van Jezus en Elisabeth van Johannes d'n Duiper. Elisabeth weurt op 't moment dat zie Maria zuut kómme vervuld van de Heilige Geis, 't kind sjprink op in häöre sjoat en zie zaet tege Maria: "Gezegend zeet geer ónder de vrouwe en gezegend ies de vröch van eure sjoat." Maria antwoordt häör mèt eine lofzank op God, 't Magnificat. De weurd van Elisabeth zint opgenomme in 't weesgegroet.
Op deze fièsdaag herdènk me dat Maria "mieddelares" ies, vanwege häör oetsjtraoling nao Elisabeth en 't kind dat zie verwach.
Maria Bezeuk veel oorsjprunkelik op 2 juli, meh umdat deze daag nao de geboortedaag van Johannes d'n Duiper veel (24 juni), haet me 't in 1969 verplaats nao 31 mei. Op sommige plaatse weurt 't fiès èvvel nog op 2 juli gevierd.
2 juli: Maria ziep
bewirkIn 't volksgeluif weurt deze daag, 2 juli, ouch "Maria-ziep" geneump: es 't dan regent zal 't dat (ziepe) zès weke blieve doon.
In de kuns
bewirkDe visitatie ies dèks oetgebeeld in de beeldende kuns, ouch waal ins in combinatie mèt 'n veursjtèlling van de Annunciatie. Bekènde veursjtèllinge van de visitatie zint die van de sjilder Jacopo Pontormo en de beelde aan de portaole van de kathedrale van Reims en Amiens.
Johann Sebastian Bach componeerde veur deze daag de bekènde cantate Herz und Mund und Tat und Leben (BWV 147). 't Magnificat ies door versjillende beroemde componiste op muziek gezat.
Visitatie ies ouch 't jaorleks bezeuk van kèrkeleke besjtuurdersj (visitatore) aan de parochies of kèrkgemeintes in hun gebied.
