Makronie

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Makronie is 'n saort aan pasta, gemaak van tervebloom (idealiter van durumterve) en water. Dit wuuertj ónger hoeag drök door 'n matries gepers. De ellebäögskes bekómme de tupische króm vorm doordet de pastasliert middels 'ne sjeifgeplaatsdje rink aan eine kantj wuuertj aafgeremp. In Italië is maccheronie 'nen euverkoepelendje naam veur gedruuegdje hol pastasaorte, wie penne. 't Liek d'rop det de sjriefwies "mac(c)aroni" is óntstangen in Ingelandj innen achtieëndjen ieëf door "The Maccaroni Club", de spottendje benaming veur modieus jóng men die de "Grand tour" hawwe gedaon en alles det op det memènt hieël modieus waas, "very maccaroni" neumdje. Det de benaming makronie noe in väöl lenj boeten Italië geldj veur specifiek de kórte ellebaogvörmige pastasaort haet wersjienlik 'nen Amerikaansen oearsprónk, veroearzaak dore käör in 1937 van aeteswaarfabrikant Kraft Foods veure kórte ellebaogvörmige pasta te verwirken in häöre kantj-en-klaore maoltied óngere naam "Kraft Macaroni and Chees".

Op 't Belsj wuuertj de naam "macaroni" gebroek veur lang, rechte, hol pastastengele, die dudelik dieker zeen es spaghetti. Door häör buusvorm haje die mieë speulwater vas en keule ze baeter aaf, zoeadet die baeter gesjik zeen veur kesjóttel es spaghetti.