Luca Brecel
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Mechels (Belsj Limburg), es te dit dialek sjpriks.
Luca Brecel (Dilse-Stokkem, 8 miert 1995) is 'ne Belsj-Limbörgse snookereer. Heer woort op 1 mei 2023 es iersten Europese vastelander wereldkampioen.
Jäög bewirk
Brecel woort mèt vief jaor op voetballe gezat, meh góng mèt nege jaor op snooker. Dao veel zie talent al gaw op, en heer won mèt tien jaor al zien ierste rezjionaol toernooi. Heer won daonao 't Belsj kampioensjap kadètte in 2007, nog mer twelf jaor aajd. De jaore dao-op späölde heer diverse jäögtoernooje, en soms ouch al bij de volwassene. In aprèl 2009 woort Brecel Europees kampioen oonder 19 - mèt veertien jaor waor 't de joonkste dee dat oets gelök waor. Vaanaof dat memint góng 'r, es amateur nog, door nao de volwasse toernoje. Nog in mei vaan dat jaor, bij de World Series of Snooker in Portugal, won 'r vaan topspeulers wie Jimmy White en Ken Doherty. In mei 2010 woort Brecel, nog mer vieftien jaor aajd, Belsj kampioen bij de seniore, en in juni won 'r ouch 't Europees kampioensjap. Wie 'r in oktober vaan dat jaor mètdeeg aon 't Power Snookertoernooj in Londe, bleek Ronnie O'Sullivan evels väöls te sterk. Toch woort heer, op 't sportgala vaan 2010, oetgerope tot belofte vaan 't jaor.
Profcarrièr bewirk
Op 5 mei 2011 kraog Brecel 'ne wildcard veur 't koumend sezoen touwgekind. Dat beteikende tot heer, mèt zèstien jaor, zien profcarrièr begós waor. Dat jaor haolden 'r get succeskes, wie zienen ierste maximumbreak in 'n amateurtoernooj in Peer. De stap nao 't profcircuit waor evels lesteg: Brecel haolde väöl toernoje gei good rizzeltaot. Pas in 't jaor 2015/'16 begós 'r consequent good te speule en stijgde heer sterk op de wereldraanklies. Ouch de jaore daonao bleef 'r good prestere; in 2017 won 'r in Kanton (China) zien ierste fullrankingtoernooj en kaom 'r de wereldwij top-16 in.
WK 2023 bewirk
Heinao pakde Brecel nog get klein successe, al woort 't gans circuit vaan snookerkampioensjappe natuurlek oonderbroke door de COVID-19-pandemie. Op 't Wereldkampioensjap Snooker góng 't evels mer maoteg: tot vief kier touw woort 'r in de ierste runde oetgesjakeld. Dit veraanderde in 2023. Iers versloog 'r Ricky Walden en Mark Williams. Heinao wport 't in de kwartfinaol tegeneuver de zevevajdege wereldkampioen Ronnie O'Sullivan gezat. Brecel zörgde veur 'n sensatie wie heer dees partij wis te winne. Tenao kaom heer in de haaf finaol tegeneuver de Chinees Si Jiahui te stoon. Si leek de match te winne wie 'r mèt 5-14 veurkaom, meh mèt 'nen inhaolslaag dee ziene gelieke in 't snooker neet kint haolde Brecel 't oetindelek mèt 17-15. In de finaol mós heer tege Mark Selby. Brecel stoont de ganse match veur, meh Selby kaom dèks nog good trök. Oetindelek won Brecel de match mèt 18-15. Zoe woort heer d'n ierste wereldkampioen snooker vaan 't Europees vasteland.
De unieke prestaties vaan Brecel brachte de snookersport prominent nao de mainstream sportmedia. Ouch d'n aonvallende späölstijl vaan Brecel trok de aondach, zoe good wie zien bravoure neve de snookertaofel. Nao zien euverwinning op Ronnie O'Sullivan beweerden 'r tot zien veurbereiing had bestoon oet neet mie es e kerteer oefene, en tot heer kort veur 't späöl nao hoes waor gegaange in Mechele um dao te game, te darte en tot deep in de nach te zoepe.