Loehansk (sjtad)
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Loehansk (Oekraïenisj: Луганськ, Róssisj: Луганск, alternatief sjpelling: Loegansk) is 'n sjtad in 't oeëste va g'n Oekraïne mit óngevier 400.000 inwuuenesj. De helf van de inwuuenesj is etnisch Oekraïenisj, de anger helf is Róssisj, dewiel bauw jieëkeree Róssisj kalt. 't Is de jure 't bestuurlik centrum van d'r gelieknamige oblas, dewiel 't de facto seër 't begin van d'r pro-Róssisje opsjtand in d'r Donbass in 2014 de hoofsjtad va g'n Volksrippebliek Loehansk is, 'ne aafsjeiingssjtaat deë besjtuurd weëd durch pro-Róssisje rebelle.
Loehansk dank zinne naam aan 't revierke d'r Loehan en ligk midde i g'ne Donbass. In 1795 woeëd hei 'n metaalfabriek gebouwd, wat de plaatsj tot e wichtig industrieel centrum maakde. Loehansk is evvel pas seër 1882 'n echte sjtad. De sjtad is dök van naam verenderd. Zoeë heesjde zie tusje 1935 en 1958 en 1969 en 1990 Vorosjilovgrad, es ierbetoeën aan ginneraal en politiker Kliment Vorosjilov. Wie de Oekraïne ónaafhankelik woeëd, kreeg de sjtad höare ouwe naam truuk.
In 2014 vónge in en um de sjtad gevechte plaatsj tusje de Oekraïenisje armee en pro-Róssisje separatiste. Vöal gebouwe raakde doabei besjadig.
In Loehansk guuef 't aantal universitete. Joarelank woar 'n locomotieffabriek d'r wichtigste werkgeëver i Loehansk en umstjreëke. De fabriek woeëd in 2015, es gevolg van 't kreegsgeweld, gesjlote. Dat gool óch vuur de lófhave, get boete de sjtad.