Lichtenberg (Venlo)
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
De Lichtenberg is 'n sträötje en 'ne lieëgen heuvel in 't centrum van Venlo. De straot löp vanaaf 't Maasschriksel tot aan de Bolwaterstraot. 't Leet in 't binnestadskwadrant Q4, det wies in de ierste jaore nao 't millennium bekind stónd es probleemwiek. 't Is 'n hiel alde straot, meugelik is zeej de aldste van gans Venlo. Volges 'n legende zouw d'n Bructerischen houfman Flujas, nao 'ne vernetigende veldslaag taege de Chamave in 't Teutoburger Wald, in zuudwestelike richting zien gefiet. Rónd 96 nao Christus zoel hae heej leime hutte en 'n börch hebbe geboewd. Dees nederzetting hoot Venloë, wat "heuvel in 'ne zómp" beteikent. Later mótte heej ouk gigantische beelde hebbe gestaon. Dees bevatde d'n as van Flujas en zien vrouw Guntrud. Tösse de beelde börde constant 'n leechske. Op die meneer zoel de Lichtenberg aan ziene naam zien gekómme.[1]