Lev Tolstoj
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Lev Nikolaevič Tolstoj, Leo Tolstoj of Leo Tolstoy (Rössisch: Лев Никола́евич Толсто́й,), gebaoren op 9 september 1828 bie Tula, gestórven op 20 november 1910 in Astapovo, waas 'ne Rössische sjriever. Hae waor 'ne graof van aedel.
Hae sjreef veural romans en novelle, meh later in zie laeve sjreef t'r ouch toneelstökker en essays. Zie bekèndjste wirke zeen Anna Karenina en Krieg en vraej, det 'm zès jaor aan sjrieve kósdje.
Tolstoj is ouch bekèndj veur zien ingewikkeldje en paradoxaal persuuenlikheid en zien extreem moralistische en ascetische standjpuntje, die d'r oetwirkdje nao 'n moreel krisis en geistelike opwèkking inne jaore 1870, doe d'r ouch opgemirk woort es 'ne moraalfilosoof en socialen hervörmer.
Hae wuuertj ouch betrach es ei vanne houffigure binnen 't anarchisme. Hae woort ónger anger geïnspireerdj door Henry David Thoreau. Tolstoj zien litterlike vertolking vanne Bergraeje maakdje 'm toet 'ne kristen-anarchis en anarchopacifis. Zie gedachdjegood euver 't "óngeweldj", dae besjreve woort in wirke wie God zie riek is binne dichzelf beïnvleudje luuj wie Mahatma Gandhi en Martin Luther King.