Landingde
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
'n Landingde of ismus is 'ne smalle strook land dee twie groeter landmassa's verbindt. De Grieke introduceerde 't woord ismus (isthmus), wat hals beteikent, en gebruukde 't in 't biezunder veur de Landingde vaan Korinthe. Daoneve zien de bekinde landingdes die vaan Panama en Suez, die alletwie twie continente mètein verbinde. Door al dees drei landingdes loupe al eve bekinde kanale.
Dèkser kump veur tot 'n landingde 'n sjiereiland mèt 't vasteland verbindt, of twie deile vaan 'n eiland mètein.
In väöl definities weurt gestèld tot 'n landingde aon beis kante door zieë begrens moot zien, mer de Karelische Landingde, die de Finse Golf vaan 't Ladogameer sjeit, bewies tot 'n meer die rol ouch kin vervölle.
't Tegeneuvergestèlde vaan 'n landingde is de väöl dèkser veurkoumende ziestraot of zie-ingde.