Kroedlaog

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De kroedlaog is de begrujjingslaog van plantje van 10 cm toet 135 cm huuegdje. Dees begrujjingslaog is verneump wore nao d'n euverhieërsjendje grujvorm vanne plantje waat hie-in veurkómme: 't kroed. De kroedlaog grujtj baove de moslaog en óngere stroeklaog.

De saorte die veurkómmen inne kroedlaog zeen veur e good deil aafhenkelik van wieväöl leech prónt doorreik. Wo de kroedlaog de hoogste begrujjing is, waere de plantje bloeatgestaldj aan vol zónleech. Hie grujje dan plantje die neet good inne sjieëm kónne wasse. In zoea val krieg me graaslandj en hei.

Wen de kroedlaog neet de hoogste laog is höbbe plantje diverse strategieje nuuedig veur toch aan zónleech te kómme. Döks grujje de plantje dan 't helste veurdet de buim en struuk blajer höbbe. De zäöj zeen dökker hieël lang keenkreftig, wodoor die drek oetkómme wen get mieë leech is. Ouch laeve bie sómmige saorte de wortelstekker langer.

De zejlinge van buim vörmen ouch 'n óngerdeil vanne kroedlaog. De ómstenjigheje worin die laeve zeen te vergelieke mit die vanne angere saorten inne laog. Juus wie 't kroed waere de zejlinge door plantjenaeters opgevraete mit wortel en tak d'raan.