Kleunkske

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

't Kleunkske (Alytes obstetricans, Nederlands: vroedmeesterpad) is 'n kroddel (Duutsj: Kröte; Aod Duutsj: Kreta), dae in 't Plat z'ne naam te daanke haat an 't geluid dat-e makt. Dat geluid liekt op 'n klukske. Och d'r Welzje naam clouctea is 'n onomatopee.

't Kleunkske, dat klinger is es 'n kroddel en gries-olijfgreunig va kleur, haat zie noordelekste versjpreidingsgebied in Nederlands Zuid-Limburg en keumt dao vöral in mergelgroeves vör.

D'r naam in ander West-Europese tale, oeë-oonder 't Nederlands, verwiest nao de oetzoonderleke meneer va drage van 't nagesjlach. 't Wiefke laet de èjkes in sjtrenge mae 't menneke drigt die sjtrenge roond de achterpuuj en op d'r rugk bies dat de larve oetkaome. Dan pas werre die larve in 'ne pool gelag. 't Liegke van de èjkes begint in 't vreugjaor mae geet dör - en dat is uniek vör kroddele - bies in 't naojaor. Per kieër werre da waal minder èjkes gelag es wie bie normaal kroddele.