Kelkwörm
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De kelkwörm of kelchwörm (Letien: Entoprocta; van 't Grieks entos "binne" en prooktos "anus") zeen 'n stam van bieëster die behuuere toete kampdere (Lophotrochozoa). De stam tèltj 170 weitensjappelik besjreve saorte. De meiste saorte laeven inne zieë, vasgehech aan rotse, grótter sjelpderen of sjelpe. 't Zeen hieël klein bieëster (maximaal 'nen halve centimaeter) die gewuuenlik slechs te vinje zeen door 't bestudere van hydroïedkelonies, groeate bryozoë, algen en hechorgane van alge. 't Lief besteit oet e boeatvörmig deil det de inwenjige organe bevatj (de calyx) en 'ne steel (pedunculus) womit 't deer is vasgehech. De calyx haet 'ne krans van ach toet dertig tentakele. Väöl saorte vörme kelonies.
Döks waere ze mit hydroïde verwardj, mer häör tentakele zeen diek, verzeen van trilhaore, trèkke vrie lankzaam samen en verdwiene daobie neet in 't capitulum.
De móndj ennen anus ligke binne de tentakelkrans. d'n Derm is denouch U-vörmig. Oppe tentakele staon trilhaore womit 'ne waterstruim kan waere veroearzaak dae zwevendje deilkes en klein proeaje nao de binnekantj vanne tentakele bringk, wovanoet dees nao de móndj waere gebrach.
Óngeslechtelike veurtplantjing door knoepvörming kump väöl veur. Bie kelonievörmendje saorte waeren anen óngerkantj vanne steel oetluipers gevörmp worop de knuup óntstaon. Dees oetluipers ligken oppen óngergróndj en blieve de individuë vanne kelonie mit einanger verbinje. Bieje geslechtelike veurtplantjing óntsteit 'ne vriezwummendje larf dae 'ne korten tied róndjzwump en daonao 'n gesjikdje plaats zeuk veur zich aan vas te zètte.