Keemeleers

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De Kemeleers zien 'n Mestreechter vastelaovendsvereineging.

Historie

Zoe wie de drei vorsteleke wijze zich roond 21 december vaan 't jaor nul op kemele nao Bethlehem begaove, zoe trokke perceis 1949 jaor later Mestreechse "oosterlinge" de stadse vastelaoveswereld in es......Keemeleers, laote veer zègke: kemielridders. Ze plaotsde zich neve de Tempeleers die, mèt Groet-Mestreechs mandaat, miejer in 't westelek stadsdeil resideerden. In 't begin waore de Keemeleers allein aktief in 't Wittevrouweveld. E paar jaor later trokke de Keemeleers (via 'n euverstepke op de Hierderweeg) 't spoor euver nao Wiek. Dao vestigde ze zich "veur good". In Wiek verliene de Keemeleers eder jaor vrije doorgaank aon de stadsprins es dee zich vaanaof de statie nao 't stadhoes begief. De Tempeleers hove ouch gein tol te betaole um vaanoet 't Keemelriek de "Groeten Optoch" te laote trèkke.

Oet respek veur de Mestreechse stadsprins höbbe de Keemeleers geine prins mer 'ne "Vors", en is Mestreech-Oos umgetouverd in "Keemelstad". In aofwieking tot de aander vastelaovesvereiniginge in Mestreech rope de Keemeleers hunne Vors oet in 'n plenair vergadering. Dees protocolair vergadering heet plaots op de derde zoondag veur de Vastelaovend. In cortêge weurt de nuie Vors door Keemelstad gerije en op de kiosk in de Percee tösse 't vollek oetgerope en geïnstalleerd.

Eine vaan de oprichters waor Herman Schmidt dee 'n greuntehal had in de Frankestraot 192 en naoderhand op nommer 195, de ierste hoftempel waor in café de Keemel op de hook vaan de Frankestraot en de Eburoneweeg.

Kleure en medailjes

Ouch de kleure vaan de Keemeleers wieke aof vaan de mestreechter vastelaoveskleure. De Keemeleers koze naomelek veur de kleure blauw en wit. Keemeleers zien Pinhawwers en dat kump tot oetdrökking in 't motto vaan de -volgens us- miest gewèlde vastelaovesmedaalje vaan Mestreech en umstreke: "de Pin", e zèlvere steefke, puntig geslepe, haangend aon de jaorlekse medaalje vaan de Keemeleers. Eine kier per jaor weurt 'ne gouwe Pin oetgereik en wel aon de regerend stadsprins vaan Mestreech, dee daobij weurt beneump tot "Pinhawwer".

Bij de Keemeleers steit de sjariteit hoeg in 't veendel en dat laote ze oonder aandere zien door hun jaorlekse bezeuk aon Huize Maasveld en diverse awwere-centra. Veur dee lètste gróp lui weurt euveriges ein vaan de sjoenste aktiviteite georganiseerd: De awwerezitting (veur alle "awwere" vaan Groet Wiek) in de groete zaol vaan Hotel de L'Empereur. Oonder 't genot vaan 'n teske koffie, vlaoj en e drenkske kinne de awwere genete vaan e sjoen vastelaoves-showprogramma.

Uzze Huidige vors (2011-2012)

Es echte Wiekse jong is heer gebore in Mestreech op 'nen doordeweekse donderdag en heet nao ziene luiertied liere leze en sjrieve op de basissjaol in Wiek. Dao heet heer ouch ziene nog altied bèste vrund liere kinne dee touwvalleg dezelfden achternaom dreug, meh wijer gein femilie vaan häöm is. E späölserke kinste beter neet mèt häöm doen, want es heer verluis daan vlege alle stökke vaan dat speul door de kamer. Vraog dat mer aon zie zuster! Heer - en welke Mestreechteneer neet - zouw wèlle tot dee wèl um te winne ouch edere vriedagaovend in de Geuseelt te zien waor, boe heer bij edere thoeswedstrijd vaan MVV op de Bospoorttribuun te vinde is. Rege dee oet de loch vèlt of 'n hoeg Maos deit häöm es aajd wedstrijdzwummer hielemaol niks, heer veult ziech daan wie 'ne vès in 't water! Nao de basisjaol heet heer de St. Michael Mavo doorloupe en wie ze häöm dao meuj waore höbbe ze häöm mèt 'n diploma nao hoes gesjik! 't Hoes vaan pap en mam in Wiek steit vol mèt souvenirs oet restaurants en vaan campings oet gans

Europa die heer en ziene beste vrund ierlek gekrege höbbe es ze dao weer 'ns de toilètte hadde gepóts mèt e bitteke teväöl sop in de stortbak. De blomme die de gemeinte zoe sjoen liet greuje in de perreke vaan Mestreech zien mie es eine kier in de blommevaas thoes bij mam op taofel versjene! Heer späölt 'n mie es verdeensteleke partij tuba in ein vaan de mies veuraonstaonde herremeniekes vaan Mestreech en daoneve ouch nog in de Wieker Fanfaar. Vaan zienen hobby heet heer zie beroop gemaak wie heer 't sjèldersbedrief vaan ziene pa hei in Wiek euvernaom. Heer geit in mei trouwe mèt 'n echte sjötterskeuningin oet Valkeberg die perceis wèt wat veur vleis tot zie mèt häöm in de koep heet.

Same mèt zien Marie-Louise en de knien Flappie woent heer in Groet Mestreech Oos aon d'n aandere kant vaan 't Gouvernemint in Heugem.

Heer is gebore op 22 jannewarie 1981 en steit bij de börgerleke stand vaan Mestreech ingesjreve es Pieter Johannes Theodoor Smeets en heer zal regere euver Keemelstad oonder de Vorsteleke naome

Pigmentaricus * Natatoricus * Symphonicus

Vors Pieter LXIII

Aajd Vorste sinds 1949.

(ierste seizoen '49-'50)

Vors Charel III-II-I 1952-50 (3, 2 & 1e)
Vors Jan VI-V-IV 1955-53 (6, 5 & 4e)
Vors Eduard VII 1956 (7 de)
Vors Jean VIII 1957 (8ste)
Vors Pie IX 1958 (9 de)
Vors Pie X 1959 (10de)
Vors Peter XI 1960 (11de)
Vors Pie XII 1961 (12de)
Vors Nol XIII 1962 (13de)
Vors Toon XIV 1963 (14de)
Vors Jean XV 1964 (15de)
Vors Wiel XVI 1965 (16de)
Vors Lou XVII 1966 (17de)
Vors Pierre XVIII 1967 (18de)
Vors Ben XIX 1968 (19de)
Vors Frans XX 1969 (20ste)
Vors Frans XXI 1970 (21ste)
Vors Frits XXII 1971 (22ste)
Vors Henri XXIII 1972 (23ste)
Vors Benno XXIV 1973 (24ste)
Vors Ed XXV 1974 (25ste)
Vors Chris XXVI 1975 (26ste)
Vors Leon XXVII 1976 (27ste)
Vors Luud XXVIII 1977 (28ste)
Vors Harrie XXIX 1978 (29ste)
Vors Paul XXX 1979 (30ste)
Vors HermanXXXI 1980 (31ste)
Vors Peter XXXII 1981 (32ste)
Vors Theo XXXIII 1982 (33ste)
Vors Henny XXXIV 1983 (34ste)
Vors Con XXXV 1984 (35ste)
Vors Jo XXXVI 1985 (36ste)
Vors Peter XXXVII 1986 (37ste)
Vors Jo XXXVIII 1987 (38ste)
Vors Jean XXXIX 1988 (39ste)
Vors Henk XL 1989 (40ste)
Vors Dré XLI 1990 (41ste)
Vors Henk XLII 1991 (42ste)
Vors Math XLIII 1992 (43ste)
Vors Joep XLIV 1993 (44ste)
Vors Justin XLV 1994 (45ste)
Vors Jos XLVI 1995 (46ste)
Vors Jeff XLVII 1996 (47ste)
Vors Alex XLVIII 1997 (48ste)
Vors Ed IL 1998 (49ste)
Vors Roel L 1999 (50ste)
Vors Lambèr LI 2000 (51ste)
Vors Jean LII 2001 (52ste)
Vors Fred LIII 2002 (53ste)
Vors Sjack LIV 2003 (54ste)
Vors Jos LV 2004 (55ste)
Vors Oscar LVI 2005 (56ste)
Vors Wino LVII 2006 (57ste)
Vors Patrick LVIII 2007 (58ste)
Vors Paul LXI 2008 (59ste)
Vors Jack LX 2009 (60ste)
Vors Philippe LXI 2010 (61ste)
Vors Richard LXII 2011 (62ste)
Vors Pieter LXIII 2012 (63ste)
Vors Joep LXIV 2013 (64e)
Vors Roel LXV2014 2013 (65e)
Vors Stephan LXVI 2015 (66ste)

Huidig Bestuur en leden.

Bestuur:

Ed Moenen

Henk van den Hof

Bert Vallen

Mark Stallinga

Richard Darding

Egidius Cratsborn

Opper: Richard Darding