Kaukasus

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De Kaukasus (Abchazisch: Кавказ Kawkas; Armeens: Կովկաս; Azerbeidzjaans: Qafqaz; Georgisch: კავკასიონი Kawkasioni; Ossetisch: Кавказ Kawkas; Perzisch: رشته‌کوه قفقاز; Róssisch: Кавказ Kawkas; Törks: Kafkas Dağları) is 'n groep aan berg tösse de Zwarte Zieë enne Kaspische Zieë en vörmp ein vanne geografische grenze tössen Europa en Azië. De Kaukasus wuuertj verdeildj inne Groeate Kaukasus in 't naorden enne Kleine Kaukasus in 't zuje, die vanein waere gesjèdj dore Koeravallei. De Kleine Kaukasus wuuertj in 't zuje begrens dore reveer d'n Arak.

De bergspitsen in 't begletsjerdj centraal deil bereiken 'n huuegdje van mieër es 5 kilomaeter, worónger twieë doeaj vólkane: d'n Elbroes (5.642 maeter) enne Kasbek (5.033 maeter). 't Gebied kènmirk zich door väöl seismische aktiviteit.

De Kaukasus strèk zich oet euver 'nen aafstandj van 1.100 kilomaeter en euver veer versjillige lenj: Róslandj (mitte autonoom regio's Dagestan, Ingoesjetië, Tsjetsjenië, Naord-Ossetië-Alanië, Kabardino-Balkarië, Karatsjai-Tsjerkessië en Adygea) in 't naorde, Georgië in 't wèsten en Armenië en Azerbeidzjaan in 't zuje. d'n Hoogste bergrögk vörmp gooddeils ouch de grenslien tösse Róslandj einerzieds en Georgië en Azerbeidjzaan angerzieds, dewiel de klèndere bergrögk Georgië sjèdj van Törkieje en Armenië.

Kwa klimaat vörmp de Kaukasus 'n euvergangsgebied tösse de gemaesigdje enne subtroeapische zaon, die ónger invlood steit van 't oceanisch Middellandjs Zieëgebied enne oetgestrèkdje Siberische vlaakdjes mit 't kóntinentaal klimaat dao. De Kaukasus haet zoea 1.400 gletsjers die 'n totaal oppervlaakdje beslaon van bao 1.800 km²; de langste hievan höbben 'n lingdje van 14 kilomaeter.

't (Naord-)Kaukasus-gebied guldj es de Róssische streek mitte meiste etnische diversiteit. In dit gebied wone zoeaget 4 miljoen luuj die kónne waere verdeildj euver e tachtigtaal klènder en grótter etnische gruup. 't Gebied zelf neump me döks Kaukasië.

Gallerie

Satellietbild.
Topografische kaart.
Politische kaart.
Etnische kaart.