Kabbinèt-Rutte II

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Zetelverdeiling vaan de VVD en de PvdA tijdens ‘t kabbinèt

't Kabbinèt-Rutte II, ouch wel ‘t kabbinèt-Rutte-Asscher genömp, waor e Nederlands kabbinèt. 't Waor e kabbinèt gevörmp door de polletieke partije VVD en PvdA. 't Stoont oonder leiing vaan premier Mark Rutte en woort op 5 november 2012 beëdeg es opvolger vaan kabbinèt-Rutte I, nao de Twiede Kamerverkezinge vaan 12 september 2012 en de dao-opvolgende kabinètsformatie. 't Kabbinèt hat in de Twiede Kamer bij de start 'n gans kleine mierderheid vaan 76 zetels. Op 14 miert 2017 had Mark Rutte 't oontslaag vaan 't kabbinèt aongeboje aon keuning Willem-Alexander. 't Is 't ierste kabbinèt sinds 1998 dat de ganse parlementaire periood vaan veer jaor heet kinne aofmake. Kabbinèt-Rutte III woort beëdeg es d'n opvolger vaan 't kabbinèt-Rutte II, nao de Twiede Kamerverkiezinge vaan 15 miert 2017 en de formatie vaan 't kabbinèt die dao-op volgde.

Nao de Twiede Kamersverkezinge vaan 12 september 2012 góng de kabbinètsformatie vaan start oonder leiing vaan verkinner Henk Kamp. Heer concludeerde tot oonderzoch moos weure of 't ’n meugelekheid gaof veur e kabbinèt vaan de groetste partije, VVD en PvdA. Oonder leiing vaan twie informatäörs vaan de twie partije, Kamp en Wouter Bos, begóste de oonderhandelinge. Iers woort e deilakkoord op de financië bereik, en later e regeerakkoord. Daonao woort VVD-leier Mark Rutte beneump tot formatäör en goof 't PvdA-congres greun leech um touw te treie tot ’t kabbinèt. 't Kabbinèt woort beëdeg op 5 november 2012 en waor mèt 54 daog formere rillatief snel gevörmp. 't Gaof de ierste kabbinètsformatie boebij keuningin Beatrix gein rol speulde. De beëdeging vaan de ministers en staotssecretarisse waor veur 't iers rechstreeks via tèllevisie en radio te volge. ’t Motto vaan ’t regeerakkoord waor “Bruggen slaan” (Brögke sloon). Vaan 't Ministerie vaan Economische Zake, Landbouw en Innovatie woort de naom gewijzeg in Ministerie vaan Economische Zake. De Minister veur Immigratie, Integratie en Asiel verdween. 't Gaof twie nui ministersposte: de poste vaan Minister veur Boetelandse Handel en Oontwikkelingssamewèrking en de Minister veur Woene en Rieksdeens.

Allewel 't kabbinèt 't ierste sinds 1998 waor wat succesvol de ganse perlementaire periood aofgemaak kraog, mooste bei partije aon populariteit inboete. Dat kaom groetendeils doortot VVD en PvdA väöl mooste snije in 't budget door d'n ikkenomische crisis. Mer 't waor ouch deils te daanke aon de groete ideologische versjèlle tösse de twie partije (liberaol en sociaoldemocratisch) mèt es gevolg tot rechse noch linkse stummers ziech neet good kóste herkinne in 't program vaan de coalitie. VVD verloor ach zetels in de verkezinge vaan 2017 en góng vaan 41 nao 33 zetels. Ze bleef evels de groetste partij vaan 't land en kraog daodoor de meugelekheid door te reagere nao de verkezinge. De PvdA verloor 'n historisch aontal zetels. Zie góng vaan 38 nao 9 zetels en verloor daomèt 29 vaan häör zetels.

Samestèlling

’t Kabbinèt-Rutte II bestoond oet daartien ministers, de minister-prizzedent en minister vaan Algemein Zake mètgetèld, en zès staotssecretarisse. Zeve ministers waore vaan de VVD, zès minister vaan de PvdA. 't Gaof in ierste instantie drei Limbörgers in ’t kabbinèt. Mer naotot de Mestreechteneer Frans Timmermans viceveurzitter vaan de Europees Kemissie goof 't d'rs twie.

Ministerie	Minister			Partij	Opmerkinge
Minister-president (MP), Ministerie vaan Algemein Zake (AZ)			Mark Rutte (1967)	VVD
Minister vaan Binnelandse Zake en Keuninkrieksrelaties (BZK)			Ronald Plasterk (1957)	PvdA
Minister vaan Boetelandse Zake (BuZa)			Frans Timmermans (1961)	PvdA	bis 17 oktober 2014
			Bert Koenders (1958)	PvdA	vaanaof 17 oktober 2014
Minister veur Boetelandse Handel en Oontwikkelingssamewèrking			Lilianne Ploumen (1962)	PvdA	minister zoonder portefeuille
Minister vaan Defensie (Def.)			Jeanine Hennis-Plasschaert (1973)	VVD
Minister vaan Economische Zake (EZ)			Henk Kamp (1952)	VVD
Minister vaan Financiën (Fin.)			Jeroen Dijsselbloem (1966)	PvdA	ouch veurzitter vaan de Eurogróp
Minister vaan Infrastructuur en Milieu (I&M)			Melanie Schultz van Haegen (1970)	VVD
Minister vaan Oonderwijs, Cultuur en Wetensjap (OCW)			Jet Bussemaker (1961)	PvdA
Minister vaan Sociaal Zake en Wèrkgelegeheid (SZW)			Lodewijk Asscher (1974)	PvdA	ouch vicepremier
Minister vaan Veiligheid en Justitie (V&J)			Ivo Opstelten (1944)	VVD	bis 9 maart 2015
			Ard van der Steur (1969)	VVD	vaanaof 20 maart 2015 bis 27 jannewarie 2017
			Stef Blok (1964)	VVD	vaanaof 27 jannewarie 2017 (vaan 10 bis 20 miert 2015 a.i.)
Minister vaan Volksgezoondheid, Welzijn en Sport (VWS)			Edith Schippers (1964)	VVD
Minister veur Woene en Rieksdeens			Stef Blok (1964)	VVD	minister zonder portefeuille