Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De ligking van Jomala in Finlandj.

Jomala is 'n gemèndje in Ålandj, Finlandj. De gemèndje haw 5.033 inweuners op 31 mieërt 2016 en 'n landjoppervlakdje van 142,55 km², van 'n totaal (inclusief water) 687,00 km². De bevoukingsdiekdje is 35,31 luuj de km². De plaatse die inne gemèndje ligke zeen: Andersböle, Björsby, Brändö, Buskböle, Dalkarby, Djurvik, Gottby, Gölby, Hammarudda, Hindersböle, Ingby, Jettböle, Jomalaby, Karrböle, Kila, Kungsö, Möckelby, Möckelö, Norrsunda, Prästgården (de houfplaats), Ringsböle, Sviby, Södersunda, Torp, Ulfsby, Vargsunda, Vestansunda, Vesterkalmare, Ytterby, Ödanböle, Önningeby, Österkalmare en Överby.

'n Boerebroelóf in Jomala.

De meiste inweuners van Jomala zeen forenze die wirken in Mariehamn. Ouch de ènsigste lóchhave vanne eilandjgroep ligk op 't gróndjgebied vanne gemèndje.

De naam Jomala is 'n verwiezing nao de Vikinggod Jom, dae hie woort verieërdj. Oet daen zelvendjen tied is 't fort Borgberget. De kirk van Jomala ligk in 't dörp Prästgården en guldj es de aadste steine kirk van Ålandj; de aadste deile kómmen oeten twellefdjen ieëf. Wiejer guuef 't nag de Kungsö-kusbatterie, aangelag dore Róssen innen Ieëste Werreldkrieg; dees ligken op 32 maeter huuegdje baovenoppe Dalsberg. In Önningeby ligk nag e klei kóns- en kultuurhistoorjemuseum, want is gemaak in 'n steine sjuur oet 1869.

De Ingbyberg bereik 'n huuegdje van 70 maeter en ligk op 'n geologische breuklaan; hie vindj me graafhäöelen oete brónstied en ouch de Trollkyrkan, 'ne kloof dae 11 maeter deep is. Wiejer guuef 't nag 't Ramsholmens-netuurrizzervaat, wo väöl biezunjer plantjen en blome, wie wilje knóflouk en orchideeje zeen te vinje.

De gemèndje is einspraokig Zweeds. De gemèndjecode is 170.

Demografie bewirk

In 2016 woor de laeftiedsverdeiling van de bevouking es völg:

  • 0 toet 14: 21,9%
  • 15 toet 64: 63,9%
  • 65 en ajer: 14,1%

De spraokverdeiling woor in 2016 det 89,2% vanne bevouking 't Zweeds es ieëste spraok haw; 4,7% haw 't Fins es ieëste spraok en 6,1% haw 'n anger ieëste spraok.

Hie-ónger völg de demografische óntwikkeling vanaaf 1980.

1980 1985 1990 1995 2000 2005 2010 2015
2.615 2.839 3.025 3.156 3.328 3.614 4.098 4.648
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Jomala&oldid=453991"