Johann Carl Fuhlrott
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
Johann Carl Fuhlrott (Leinefelde, 31 december 1803 – Elberfeld, 17 oktober 1877) waor 'ne Duutsje wetensjapper dae dör de oontdèkking van d'r Neanderthaler bekaand waoërt es ènge van de groondliegkers van de paleoantropologie.
Fuhlrott sjtudeerde wiskunde en natuurwetensjappe an de Universitèèt va Bonn en waoërt daornao lieërer an 't gymnasium in Elberfeld. In 1856 kreeg e 'n aantal knäöek oet 'n sjtèègroeve in Mettmann te zieë oeëvan de veenders veroondersjtèlde dat dis aafkomstèg wieëre van 'ne baer. Fuhlrott constateerde evvel dat 't öm hieël ow miensjeleke knäöek góng, mae nogal versjilde van de gewoeën miensjeleke överbliefsele. E leet de knäöek an Hermann Schaaffhausen, d'r patholoog-anatoom van de Universitèèt va Bonn zieë. In 1857 makde ze hön oontdèkking publiekelek bekaand oeëbie ze sjtèlde 'n aod miensjelek ras gevoonde te ha, d'r Neanderthaler. Aangezieë dat neet sjtrookde mèt 't gangbare (biebelse) waeltbeeld en Charles Darwins waerk över evolutie nog neet gepubliceerd waor doorde 't lang väördat hön oontdekking erkaand waoërt.
Publicaties
bewirk- Fuhlrott, C.J. (1859) - « Menschliche Ueberreste aus einer Felsengrotte des Düsselthals. Ein Beitrag zur Frage über die Existenz fossiler Menschen », Verhandl. Naturhist. Ver. Preuss. Rheinlande Westphalen, 16, pp. 131-153.
- Fuhlrott, C.J. (1865) - Der fossile Mensch aus dem Neanderthal und sein Verhältniß zum Alter des Menschengeschlechts, Duisburg, 78 S. 2 Abb.
