Joh. Kempkes

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

Johannes Kempkes (Kempkens) (gebaore in Mofert; 1906 - 25 oktoeaber 1980), inne wanjeling baeter bekèndj es Sjang of Hannes van Driekes van Keuningske, woor 'ne Moferse dichter en heimkóndige. Hae haet diverse jaore deilgenómmen aan 't bestuur vanne gemèndje. Ouch haet d'r de weiteswaerdighede van zien stedje en 't kestieël bestudeerdj.

In Mofert is 'n straot ane Kestieëltuine nao 'm verneump.

Oos Mofert

Dao wo dae Grawwert gries van al die ieëwe steit

dae stil nag mit zien wuiste toretrómpe

dao druimptj van lang vergange hieërlikheid

wo veldj en wei me wón oet zandj en zómpe

dao lik oos Mofert, det ós baove alles geit.

Dao wo de windj door 't ieëwig greun van denne roes

in Kemperkes, op Galgeberg en Zweeltje

wo ieërlik vlietig volk me vindj in eder hoes

en langs de waeg ei kruuts steit of ei beeldje

det is 't dörp det geine veur ein anger toes.

Dao sleitj de maerling somers en de nachtegaal

wen róndjóm alles steitj te bleuje en te zinge

dao sprik nag de natuur Oos Leven Hieër Zien taal

en eder Moferter haet zien herinneringe

aan Goudberg, Reigersbrook of Roeazendaal.

Dien straote zeen noe ruum, dien hoezer net en nuuj

doe kreegs ónmienselik oorlogsleid te drage

al leeks do mit dien hoezer en dien luuj

veur altied ónherstèlbaar neergeslage

doe stóngs weer op en kooms toet grótter bleuj.

Al krump ouch bie 't massagraaf oos hert bie-ein

van sjrumpelik leid in blood en traone

al zoog me van oos dörp nieks mieër es belk en stein

veer móste wiejer laeven en wone

en einsgezindj boewdje veer same aan oos heim.

Liektj waal dien plaats väöl ajer es besjreve steitj

mit bós en brook, mit brökske en mit baeke

doe bös van ós mit al dien leef en leid

dien waal en wieë, dien deugde en gebraeke

doe bös det dörpke wo gein baove geitj.

Trivia

• In 1977 höbbe Graat Maosse, Baerke vanne Seel en Joh. Kempkes Mofert vertaengeweurdig bie 't interactief ROZ-speelprogram in wèdstriedvorm tösse Limburgse plaatse, 'Heen en Weer'. In 'n euver en weer van historische vraoge euver de eige woonplaats, höbbe ze Valkeberg verslage in 'nen halve finale, wonao ze zich ouch taenge Vloearep höbbe beweze.

Brónne

• Mertens W.J., Jeurissen H.W., Mestrom S. 1985, MOFERT - Bezatj, Verwoes en Bevrèdj