Joeri Verlinden
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Remunjs, es te dit dialek sjpriks.
Joeri Verlinden (Remunj, 22 jannewarie 1988) is 'ne Nederlandjse topzjwömmer dae gesjpecialiseerd is in de vlindersjlaag en de vrieje sjlaag.
Verlinden is lid van 't Nationaal Zjwöminsjtituut Amsterdam wo hae wirt getraind door Martin Truijens. Eërder trainde hae ónger leijing van veurmalige waereldkampioen Marcel Wouda biej 't Nationaal Zjwöminstituut Eindhove. Verlinden is op zoawaal de korte- es de langebaan hawwer van alle Nederlandjse records op de vlindersjlaag. Eërder zjwóm hae biej RZ, HGK en de Roersoppers. Naeve 't zjwömme sjtudeert hae Biomedische Technologie aan de Technische Universiteit Eindhove.
Zjwömcarrière
bewirkNao ein hauve finale plaatsj op de 50 maeter vlindersjlaag biej de EJK 2005 in Boedapes en ein zevende plaatsj biej de EJK 2006 in Palma de Mallorca maakde Verlinden zien senioredebuut biej de Europese kampioensjappe kortebaanzjwömme 2006 in Helsinki. In de Finse hoofsjtad sjtrande hae in de series van de 50, 100 en 200 maeter vlindersjlaag.
Biej de Dutch Open Swim Cup 2007 kwalificeerde Verlinden zich veur de Europese kampioensjappe zjwömme 2008 in Eindhove op alle vlindersjlaagnummersj en nomineerde hae zich es vlindersjlaagzjwömmer veur de wisselsjlaag estafette. Op de EK woort hae oetgesjakeld in de hauve finales 50 en de 100 maeter vlindersjlaag en in de series van de 200 maeter vlindersjlaag. Mèt ziene tied van 53,09, op de 100 maeter vlindersjlaag, bleef hae 23/100e seconde baove de individuele limiet veur de Olympische Sjpele. Doordat de 4x100 maeter wisselslag estafette de deilname aan de Sjpele misde, moosj Verlinden ouch thoesblieve. Hae naom ènnige waeke nao de EK waal deil aan de waereldkampioensjappe zjwömme kortebaan 2008 in Manchester. Hiej sjtrandje hae in de series op de 50 maeter vlindersjlaag en eindigde hae es zöstieënde op de 100 maeter vlindersjlaag. Op de 4x100 maeter wisselsjlaag zjwóm hae ein Nederlandjs record same mèt Bastiaan Tamminga, Robin van Aggele en Mitja Zastrow. Dit kwartèt eindjigde daomèt op de achste plaatsj. In Rijeka naom de Nederlanjer deil aan de Europese kampioensjappeen kortebaanzjwömme 2008, wo hae es zevende eindjigde op de 100 maeter vlindersjlaag. Op zoawaal de 50 es de 200 maeter vlindersjlaag woort hae oetgesjakeld in de series.
Van 2009 pes noe
bewirkBiej eine limietwedsjtried in april zjwóm Verlinden ein nuuj Nederlandjs record op de 200 maeter vlindersjlaag korte baan (1.51.64). Bienao de ganse race zjwóm hae ónger 't waereldrecord van de Rus Nikolaj Skvortsov. Op de waereldkampioensjappe zjwömme 2009 in Roame sjtrandje Verlinden in de hauve finale van de 200 maeter vlindersjlaag en in de series van de 100 maeter vlindersjlaag en same mèt Nick Driebergen, Lennart Stekelenburg en Sebastiaan Verschuren woort hae gediskwalificeerd in de series van de 4x100 maeter wisselsjlaag. In Istanboel naom de Nederlanjer deil aan de Europese kampioensjappe kortebaanzjwömme 2009. Op dit toernooj eindigde hae es veerde op de 100 maeter vlindersjlaag, es viefde op de 200 maeter vlindersjlaag en es zösde op de 50 maeter vlindersjlaag. Op de 4x50 maeter wisselsjlaag eindigde hae same mèt Nick Driebergen, Robin van Aggele en Bastiaan Tamminga op de viefde plaatsj.
Biej de Europese kampioensjappe zjwömme 2010 in Boedapes veraoverde Verlinden de zilvere medaille op de 100 maeter vlindersjlaag en eindigde es zösde op de 50 maeter vlindersjlaag. Op allebei dees nmmersj zjwóm hae ein nuuj Nederlandjs record. Same mèt Nick Driebergen, Lennart Stekelenburg en Sebastiaan Verschuren sjleipde hae de brónze medajje in de wach op de 4x100 maeter wisselsjlaag, opnuuj in ein nieuw Nederlandjs record.
Ambassadeur van de Neersjtichting
bewirkNao zien gebaorte woort biej Joeri Verlinden ein neerafwieking geconsjtateerd, wat es gevolg hèj dat zien rechterneer moosj waere verwiejerd. De zjwaor operatie die hae óngerging goof gein zekerheid of hae dit waal zouw euverlaeve. Veur zien awwesj en zien breurke waas dit ein meujlikke periood. Ómdat Joeri door ’t misse van ein van zien nere gein contactsjporte moch doon, is hae net wiej ziene broor Sander, gaon zjömme. Saer is hae 'versjlaaf' aan dees sjport en vanaaf ziene eësjte wedsjtrieje die hae zjwóm góldj hae es eine greuj-diamant op de vlindersjlaag. Sinds kort is hae gevraog door de Neersjtichting Nederlandj óm veur hun es ambassadeur op te traeje. Hae is es zoadanig te zeen en te heuëre op de TV en radio óm de luuj te vraoge óm te donere aan de sjtichting.