Jan Bremmers
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
Jan Bremmers (1926-2008) kaom oet Remunj. Hae sjreef sonnette en verhaole in 't Remunjs.
Biografie bewirk
Hae is gebaore in Remunj op 23 mei 1926. As 18-jaorige waerde hae in 1944 opgepak mit anger Remunjenere veur dwangarbeid in Pruses. Wie d’r dao in 1945 van trök kwaam mós hae in militaire deens en waerde nao Nederlands-Indië gesjtuurd. Euver det landj haet hae ouch sonnette gesjreve.
Mit 59 jaor is hae mit pensjoen gegange en nao ’t winne van de tweede plaats bie de Veldeke-literatuurpries in Weert mit zien verhaol “de boot” ging hae wiejer mit ‘t sjrieve van verhaole en sonnette. Heel döks waerde hae genomineerd veur dae pries. Hae waas lid van de Veldeke-Krink-Remunj en van de Sjrieverskrink van Veldeke Literair.
In 2001 kwaam zien eerste book oet. De gedichtebundel : ”Örges mós ich beginne”. In zien tweede book “Öorlog wie ’t kwaam en wie ’t ging” sjtaon verhaole euver d’n oorlog en zienen tied in Pruses as dwangarbeider. De beuk zeen allebei oetgegaeve bie Oetgaeverie TIC in Mesjtreech.
Same mit diverse anger sjrievers van Veldeke Literair haet Jan ouch ’n gedeilte van ‘t book ”’t Titelgevech” van Asterix en Obelix in versjillende Limburgse dialecte vertaald. Hae haet de Remunjse tekst (de sjeldaote) veur zien raekening genaome.
Hae waas versjillende jaore achterein jurylid bie ‘t Groot Remunjs Dictee en haet bie ’t dictee van 2007 Lodewijk Imkamp ‘n map mit 100 sonnette aangebaoje veur ’t Gemeintearchief mit de wäörd: “Dan motte degene dae nao mich kómme mer zeen waat ze daomit doon”. (Dees map is te vinje bie ’t Gemeintearchief ónger nómmer 41 B 170).
Hae haet mitgewèrk aan ’n sjtudie euver ”Stoot- en sleeptonen van het Roermonds” die gehaje waerde aan de Universiteit van Nijmegen. Ouch veur Belsj en Pruses zeen de versjille in dialecte bekeke.
Bie Veldeke en in Pruses haet hae dök veurgelaeze oet eige wèrk.
Op 20 januari 2008 is hae in Remunj gesjtórve.
Bibliografie bewirk
- Örges mós ich beginne, 2001, LiLiLi 28
- Oorlog, wie 't kwaam en wie 't ging, 2005, LiLiLi 46
- In de jaorbeuk van de Heemkunde vereniging Roerstreek 2001-2007 en in meerdere tiedsjrifte van Veldeke zeen sonnette van Jan opgenaome