Huug

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De huug (Letien: uvula) is 't puntjig aanhingsel det me kan zeen wen me bie emes dae "aaa" zegt innen aope móndj kiek. De huug is d'n oetluiper van 't zaach verhieëmeldje. Dit liefdeil kan bie versjillige luuj 'n sterk-versjillendje gruuedje höbbe. De huug zörg veure sloeting vanne naashäöldje bie 't slikke.

Bie sómmige luuj is de huug gesplete; det kan den waere gezeen es de mins wied-gevörderdje vorm van schisis, e gesplete verhieëmeldje. Wen me gein biekómmendje aafwiekinge haet is 't gaar ónsjajelik enne meiste luuj die det höbbe weiten 't zelf gèn èns.

Bie kaelóntstaeking en ernstige allergische reaksjes kan de huug döchtig opzwellen en e glazig uterlik kriege.

De huug besteit veural oet alveolair klieren en e deil vanne musculus uvulae (wovan de res in 't zaach verhieëmeldje ligk). Dees spier kan zich sametrèkke, wodoor de huug wuuertj verkórtj.

Binne de fonetiek is de huug van belank, ómdet t'r wuuertj gebroek veur 't oetspraeke van uvulair klenk.