Hoof vaan Tilly
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
D'n Hoof vaan Tilly is ;n komplex gebouwe en aajd stadspalies op de Groete Grach in 't centrum vaan Mestreech. De gebouwe centrere ziech um 'ne rechhokegen hoof. De naom vaan d'n hoof kump vaan de Militair Gouverneur vaan Mestreech dee 't gebouwd heet en Tilly hètde.
De historie vaan d'n hoof geit trögk nao 't jaor 1529. Toen stoonte 'n kloester (refugiehoes) en 'n kapel vaan 'n adelek damesstif oet Munsterbilze aon d'n hoof. 't Aongeziech verandert in 1714 gróndeg. Veur de graof vaan Tilly, d'n hier Claude-Frédéric t'Serclaes vaan Tilly, woort in 1714 't stadspalies gebouwt. De graof vaan Tilly woort in 1718 militair gouverneur vaan de stad en blijf dit tot zienen doed in 1732. D'n hoof bestoont oet 'n' poortgebouw en 'n' gebouw mèt vleugele wie 'nen U-vörm um 'nen hoof. 't Poortgebouw en 't middelste gedeilte vaan 't aajd U-vörmeg gebouw zien euvergebleve. Sinds 1834 deende d'n hoof es 'n lieger Riekssjaol. In 1885 woort aon de binnekoer eine vleugel (en 'n turnzaol vaan vakwèrk mèt brikke aachter d'n hoof) touwgevuug, wie d'n hoof 'n Riekkweeksjaol woort. Mie es hoonderd jaor later woort d'n hoof 'n vesteging vaan de Hoegesjoal Mestreech in 1990. In 1998 köp de Universiteit vaan Mestreech d'n hoof vaan Tilly en liet 't restaurere. Ze veuge 'n verdeeping touw aon ein vaan de vleugele. Sinds 2003 is 't de Faculteit vaan de Cultuur- en Maotsjappijwetensjappe dee in d'n hoof gevesteg is.
