Hendrik III van Gelder

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Hendrik III van Gelder waas de jóngste zoon van Gerard III van Gelder. Hae wuuertj ouch döks Hendrik van Mofert of Hendrik van Luuk geneump. In Mofert is hae veural bekindj ónger de naam Hendrik van Gelder. Waarsjienlik is d'r in 1226 in Kloeaster Kamp gebaore. Hae koom in de loup vanne dertieëndje ieëw in 't bezit van inkele Gelderse gebiede. Dees gebiede waerdje de Hieërlikheid Mofert. Róndj 't jaor 1260 boewdje d'r 't Kestieël Mofert. Hae waas van 1247 toet 1274 prins-bisjop van Luuk. Hae waerdje namelik door Paus Gregorius X 'onieërvol' óntslage ómdet d'r zich neet bisjopswaerdig gedroog. Hendrik woor dao neet blie mit, want op dees meneer leep d'r inkómste mis. Hae troch doaróm dökker mit e legerke door 't landj van Luuk óm te klawwe. Op e gegaeve moment hawwe de Luukenieëre dao genóg van, en verklaordjen 'm in 1277 'vogelvrie'. Det woor doe zien raejen óm e testament op te stèlle.

In 1284 leep Hendrik mit zie leger bie Franchimont inne val. Hae kós nag juus ewegkómme, meh de Luukenieëre zoten 'm achternao. Veurdet d'r op 't Kestieël kós komme, waerdjen 'm door zien achtervolgers tusse Lin en Mofert mit 'ne knots ziene kiebes ingehouwe. Bie ajer luuj steit dao landjboewgróndj bekindj es "Prinske-zie-Graaf", verneump nao dit veurval.

Wie d'r doead woor èrfdje ziene naef Reinoud I van Gelder de Hieërlikheid Mofert. Hendrik lèk begrave inne Munsterkirk in Remunj.

Prins-bisjop van Luuk

Wie in 1246 de prins-bössjop van Luuk stórf, waerdje door Otto II van Gelder alles in `t wèrk gestèldj óm Hendrik bisjop te make van dit mechtige Prinsbisdóm. De Luukse bevolking waas hie totaal neet van gedeendj. Doordet Otto ouch in Roeame väöl invloed haw, waerdje Hendrik toch nag op 10 oktoeaber 1247 gekaoze toet bisjop van Luuk. Pas in 1258 waerdje d'r toet priester gewiedj. Hendrik steit zeker neet bekindj es 'ne vrome priester. In Luuk leet d'r zich neet dök zeen, want hae goof de veurkeur aan oorlog veure. Hae stóng bekindj es 'ne 'vrouwe-sjender' en hae sjientj waal 61 kinjer gadj te höbbe.