Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Heimo (fl. 1170-1180) waor 'nen in 't Maosland, in huieg Nederlands Limbörg, actieve beeldhouwer. Heer weurt geassocieerd mèt 'n aontal kapitele en tympaone in Nederlandse kèrke, die hure bij 't wienege wat 't land aon romaanse beeldhouwkuns te beie heet. Heer en zien sjaol weure tot de Maoslandsculptuur gerekend.

De naom Heimo is bekind vaan ein inkel kapiteel in de wesbouw vaan de Sintervaoskèrk in Mestreech. Hei-op is te zien wie 'ne beeldhouwer dee deze naom dreug e compleet kapiteel aon Maria aonbeit. Dit werkske is neet per se vaan Heimo zelf, 't kin hiel good 'n ierbetuin vaan 'ne lierling zien. De naom (op te vatte es Aimo(ne)) deit dinke tot Heimo 'nen Italiaon waor, en wel eine oet Emilia-Romagna. Dit weurt oondersteund door de stijl vaan 't beeldhouwwerk: gedetailleerd en veur d'n tied oongewoen realistisch.

Me nump aon tot väöl Nederlands beeldhouwwerk oet de laten twelfden iew ofwel vaan Heimo is ofwel vaan aander beeldhouwers oet zien equipe, die me de Heimosjaol neump. Neve versjèllende reliefs oet de Sintervaos kin me werk vaan de Heimosjaol vinde in de Pieterskèrk vaan Utrech.

Bronne bewirk

Neve de oonderstoonde link is gebruuk gemaak vaan de Winkler Prins Encyclopedie, zevenden drök, deil 13, p. 794.

Links bewirk

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Heimo&oldid=350069"