Hamer en moker

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Heëlesj, es te dit dialek sjpriks.

Hamer en moker zien 'n internationaol symbool veur mijnbouw. D'n hamer en de moker zien de twie werktuige boemèt me vreuger mijnbouwwerk deeg: mèt d'n hamer (pik) pikde me in 't erts en mèt de moker sloog me drop. Later kaom 't opbloze mèt polfer (nog later dynamiet) in gebruuk, vaanaof de industrialisatie groof me d'n erts ouch machinaol oet.

In 't waope vaan 't watersjap Roer en Euvermaos, es symbool vaan Zuid-Limbörg.

Es symbool veur mijnwèrkers stamp 't al oet de zestienden iew. 't Bleef ouch naotot dees instrumente in oonbruuk raakde; me zuut 't symbool zjus dèkser trök vaanaof de negentienden iew. In d'n ierste plaots zuut me 't veel op kojle zelf; daoboete op waopes vaan plaotse die door de kojl groet zien gewore, op kaarte en es symbool veur de wèrkende klas in 't algemein, soms politiek (es 'n soort alternatieve hamer en ziech in contexte boe landbouw neet vaan belaank waor), soms neutraol (beveurbeeld in 't Nederlands spoorbeukske um werkdaog aon te geve).