Hèrkebósjer

Dit artikel is gesjreve (of begós) in 't Hèrkebósjer. Laes hie wie v'r mit de versjillende saorte Limburgs ómgaon.

't Hèrkebósjer is 't Oos-Limburgs dialek det ze kalle in Hèrkebósj. Typerend aan dit dialek is det 't mitdeit aan de Zelfkantjse diftongeiering. 't Is 't einige dialek in de Roersjtreek det det duit. Wiejer deilt 't, in de regio oetsjloetend, mit 't Vlórps, Posters en 't Ètsberger det de -sj aan 't inj van e woord es dusdanig bewaard is gebleve; me zaet dus flesj en neet fles. E lètste kinmerk is det ze op 't Hèrkebósjer sjpraeke van e pötsje, en neet wie in Mofert en Postert van e pötje. 'n Typische Hèrkebósjer frase is dus e pötsje beier.

Me zaet in Hèrkebósj haje en neet haoje; altied en neet ummer; gewesje en neet gewasse. Wiejer is mouillering neet zo prominent aanwezig es in Mofert.