Gibraltarees hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

't Gibraltarees hierevoetbalèlftal vertreujt Gibraltar, e Brits euverzies territorium aon de zuidkös vaan Spaanje, in internationaol voetbalmatche. Gibraltar heet de kleinste bevolking en wiedoet 't kleinste groondgebeed vaan alle UEFA-lidstaote, meh voldeit (nog zjus) aon de eise um officieel wèdstrije te kinne speule. 't Team heet in zie kort officieel bestoon wieneg succes gehad; per 20 september 2018 stoont 't 198e (vaan 211 èlftalle) op de FIFA-Wereldraanklies. Vaan alle Europese teams stoont allein San Marino nog lieger. 't Team weurt gereguleerd door de Gibraltar Football Association (GFA).

Historie

Al ietot Gibraltar ziech bij de groete voetbalboonde aonsleet, gaof 't 'n officieus èlftal. Dit èlftal woort geformeerd um mèt te doen aon de Island Games, e toernooj veur neet-zelfstendege eilen, boe Gibraltar, al is 't gein eiland, ouch aon moch mètdoen. Op 4 juli 1993 späölde Gibraltar zienen ierste match, 'n 1-2 verlees tege Jersey. In de poule zaote wijer Greunland en Ynys Môn (Anglesey); Gibraltar verloor alle matche en indegde es lèste. Ouch aon de Island Games vaan 1995 deeg 't mèt. Hei góng 't beter: nao weer e verlees tege Greunland won 't team mèt 2-1 vaan Isle of Man en mèt 2-0 vaan Ynys Môn. Oetindelek strandde Gibraltar in de finaal tege Isle of Wight. Sindsdeen deeg Gibraltar mèt aon de mieste Island Games; tot aon de officieel erkinning vaan 't èlftal in 2013 oontbraok allein in 2005 (zuug oonder). In 2003 zatte ze tege Sark zelfs 19-0 neer (dit team, wat einmaoleg geformeerd woort, verloor alle veer zien matche op de Island Games mèt minstens 15-0) en in 2007 woort Gibraltar kampioen. Ouch deeg Gibraltar in 2006 mèt aon de FIFI Wild Cup, 'n officieus wereldkampioensjap veur neet-FIFA-leie.

Al sinds 1999 waor Gibraltar op zeuk nao erkinning vaan de UEFA. Dit stuitde op zwoer verzat vaan veural Spaanje, wat Gibraltar es zie groondgebeed claimp en daobij gei precedent wouw sjöppe veur erkinning vaan de (al bestoonde) Catalaanse en Baskische èlftalle. Nao nog 'n weigering in 2007 brach Gibraltar de zaak veur d'n internationaole sporttribbenaol CAS. Nao e hoeger beroop in 2011 besloot dees instantie in 't veurdeil vaan Gibraltar. De UEFA had naomelek de regel tot allein oonaofhenkeleke len ziech kóste aonslete nao 2007 ingestèld, dus pas naotot Gibraltar um lidmaotsjap had gevraog. Es gevolg daovaan woort de boond op 't UEFA-congres vaan 24 mei 2013 tot de UEFA touwgelaote. Zoedoende kós 't èlftal op 19 november vaan datzelfde jaor zienen ierste match speule, e 0-0 geliekspeul tege Slowakije. De aonsleting bij de FIFA veroerzaakde nog probleme, umtot FIFA-baas Sepp Blatter ouch 't argumint aonveurde tot Gibraltar neet zelfstendeg waor. Oetindelek woort de GFA ouch hei in 't geliek gestèld en kós Gibraltar op 16 mei 2016 lid weure vaan de FIFA, nog zjus op tied veur de aonkoumende WK-kwalificatie.

Gibraltar heet sindsdeen mètgedoon aon de kwalificatie veur 't EK vaan 2016 en 't WK vaan 2018. In allebei de kwalificatiereekse verloor 't al zien matche. In vrundsjappeleke matche wis 't team evels wel te winne of geliek te speule. In oktober 2018 bookde 't èlftal, wat nog noets e punt in 'ne competitieve match had gepak, twie kier achterein 'n euverwinning in de UEFA Nations League: Armenië woort op 13 oktober mèt 0-1 geklop, Liechtenstein drei daog later mèt 2-1. In de hervörmde Nations League vaan 2020/21, boe-in op niveau D nog mer rillatief wieneg teams zitte, wis Gibraltar zien poule (boe-in wijer Liechtenstein en San Marino zaote) zelfs te winne, zoetot 't 't seizoen dao-op (2022/23) promoveerde nao niveau C. Dao degradeerde 't evels weer vrij snel oet.

Op 18 november 2023 mós Gibraltar, in 'n EK-kwalificatiematch tege Fraankriek, 't historisch verlees vaan 14-0 incassere. Neet allein waor dit e record veur allebei de teams (Gibraltar had iejer in 2017 mèt 9-0 vaan 't Belsj verlore, Fraankriek had in 1995 Azerbeidzjan mèt 10-0 geklop), 't waor ouch de groetsten oetslaag in de historie vaan 't EK en häör kwalificatie (wat sinds 2006 op naom had gestande vaan de match Duitsland-San Marino, die 13-0 waor gewore).

Sinds Gibraltar aon officieel toernoje maag mètdoen, kump 't ierste èlftal neet mie op de Island Games oet. In 2013 en 2017 oontbraok Gibraltar gans op 't voetbalgedeilte, in 2015 sjikden 't zie jäögèlftal.