Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


Dit artikel geit euvere waterkaetel; veure netuurlike brón, zuuch: geiser.

'ne Keukegeizer.

'ne Geizer (oetspraok mit stoeattoean: gei\zər) of 'ne doorstruimverwurmer is 'n apparaat det deentj veure bereijing van werm water. 't Water wuuertj hiebie meistes verwurmp middels aerdgaas, sómtieds mit propaan of butaan, mer 't guuef ouch geizers die gebroekmake van lektriciteit. De naam vanne kaetel is aafgelèdj van 'ne geiser, 'n wermwaterbrón inne netuur.

'ne Geizer is e wermwatertoestèl wobie 't water allein wuuertj opgewurmp wen 't nuuedig is en dus 't wuuertj opgevraog. Dit in taengestèlling toet 'ne builer wo 'n wieväölheid werm water op temperatuur wuuertj gehajen in e geïsoleerdj vaat. Me neump 'ne geizer daoveur owwel 'ne doorstruimverwurmer en 'ne builer 'ne wermwaterkaetel. De benaming "waterkaetel" is veur 'n geizer dus eigentlik neet krek, tródsdet die väöl wuuertj gebroek inne vouksmóndj.

In 't kaadwaterdeil van 'ne gaasgeizer zitj e membraan; bieje wermwaterkraan geslaoten is de waterdrök aan bèdskantje van 't membraan geliek. Wen me dees kraan aopdrejtj zal de drök ónger 't membraan grótter waere wodoor dit nao baove waeg en via 'n stif de houfgaasklep bedeentj. De waakvlam zal den de brenjer doon óntstaeke. Rónjelóm en baove de brenjer zitj de wurmdjewusjelieër worop ane boetekantj in 'ne spiraalvorm de waterleijing is gesoldeerdj. Dees doorstruimbuus lup onna op-en-aaf baove de branjer in e lamèlleblok, zodet 't water zoväöl meugelik verbranjingswurmdje kan opnumme.

Allewiel is de geizer gooddeils verdrónge dore cv-kaetel.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Geizer&oldid=420656"