Berg (geologie)

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

'ne Berg is 'n landjvorm die besteitj oet e bepirk gebied det dudelik hoeager is es de ómgaeving. De ziejkenj van 'ne berg bestaon oet mieër of minder steil hellingen en 't reliëf op en rónjelómme berg is groeat. 'ne Berg is in 't algemein hoeager en steilder es 'nen häöel, mer 't guuef gein vaste definitie veur 't óngersjied tösse de twieë. Sómtieds wuuertj de definitie aangehaje det 'ne berg zich mieër es 200 toet 300 maeter baove zien ómgaeving verhöf; 'n kleinder verhöffing neump me den 'nen häöel.

Inne geologie en aerdriekskónde óngersjèdj me berg nao huuegdje, ligking of de wies worop die zeen óntstange. Wen väöl berg biejein ligke neump me det op 't plat gewuuen in 't mieëvaad berg. Berg kónne bestaon of bergkittinge, aaneingeslaote rieje van berg, of bergmassieve, gruup aanein vas zittendje berg.

Tösse berg in ligke lieëger gebiede. Meistes zeen det daal of vlakdjes. Berg kónne verbónje zeen door bergkampen of gräöt. 't Lieëgste puntj oppe graot tösse twieë berg wuuertj 'ne zaal of bergpas geneump. 't Hoeagste puntj van 'ne berg wuuertj d'n toep geneump. 'ne Berg kan ouch mieëder tuup höbbe die verbónje zeen door gräöt of klein zale.