Friet-ei
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
't Friet-ei of Frietei is 'ne snack dae aafkómstig is oet de stad Venlo. 't Liek vuuel op d'n eierbal, 'ne snack dae bekind is in 't naorde van Nederland. 't Friet-ei besteit oet 'n gehauveerd ei, det is umhöld mit salpicon of ragout en wuurt gepaneerd. 't Wuurt vervólges gefrituurd. De snack woort in 1959 door de familie Schreurs oetgevónde[1], de eigenaere van Automatiek Picadilly. Huuj d'n daag is de snack in de meiste fritures verkriegbaar. Frieteiere waere ummer vers verkoch en zien mer beperk houdbaar. Invrere is meistal gein optie door 't ei.
't Is neet gans dudelik wao 't friet-ei of d'n eierbal wirkelik is oetgevónde. Zoeëwal d'n iersten eierbal es 't ierste friet-ei woorte in de jaore vieftig gefrituurd in de staej Groninge en Venlo.[2] 'n Klein verschil is det 't friet-ei ouk kin bestaon oet 'n völling van stökskes ei mit ragout. D'n eierbal haet daorentaege ummer 'n hauf ei es völling mit ragout d'r umhin. Ouk in Schotland besteit 'ne vergeliekbare snack, 't Scotch egg.
Zeuk ouk
bewirkMit friet-ei kin ouk 'ne band oet Venlo waere gemeind: Friet-Ei.