Frederik van Iterson

Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Remunjs, es te dit dialek sjpriks.

Frederik Karel Theodoor van Iterson (Remunj, 12 mieërt 1877 - Den Haag, 11 december 1957) waas 'ne hoagleëraar werktuugboewkunde en directeur van de Nederlandjse Sjtaatsmiene.

Van Iterson, zoon van Gerrit van Iterson en Agatha van Woelderen, sjtudeerde werktuugboewkunde aan de Polytechnische sjoal in Delf, wo hae in 1899 't ingenieursdiploma behaolde. Nao ziene sjtudietied wirkde hae biej ein werf in Haarlem en woort hae veur baggerwerk oetgezónje nao Guadalquivir. Tweë jaor later trooj hae in deens biej de gemeintewerke van Den Haag wo hae de leijing kroog euver ein gaasfebriek. In 1910 woort hae in Delf beneump tot hoagleëraar, en drie jaor later, in 1913, woort hae beneump tot directeur van de Sjtaatsmiene in Haerle en kroog hae de leijing euver de baovegróndjse werke.
Hae verwórf internationale faam mèt zien óntwerp veur eine betónne keultaore dae ein zelfdragende consjtructie van gewaopend betón hej. De hyperboloïde vörm van de consjtructie zörgde veur eine zelfdragende sjtructuur en veur ein natuurlikke trèk in de "sjoarsjtein". De keultaore sjtóng decennia lank veur 't logo van de Sjtaatsmiene.
In 1930 óntving hae ein eëredoctoraat van de TH Delf, en in 1931 de Conrad-medaille van 't Keuninklik Insjtituut van Ingenieurs (KIVI). In 1934 woort hae beneump tot lid van de Keuninklikke Nederlandjse Akademie van Weitesjappe (KNAW).
Nao de Tweëde Waereldaorlog waas hae betrokke biej de wederopboew door de oprichting van 't industrieel adviesbureau Tebodin.
In Gelaen is ein sjtraot geneump nao Van Iterson.

Oetgebreijde biografie bewirk

Frederik Karel Theodoor van Iterson

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Frederik_van_Iterson&oldid=434023"