Feliformia
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De Feliformia of Feloidea zeen ein vanne twieë óngerorde (sómtieds opgevatj es 'n superfemielje) oete orde vanne roufdere (Carnivora). Toet dees óngerorde behuuere de katechtige (groeat en klein katte), de hyena's, de mangoesten enne civetkatechtige.
De anger óngerorde is de Caniformia of Canoidea, wotoe ónger anger de hóndjechtige behuuere. Caniformia en Feliformia versjille vanein inne vorm vanne bulla tympanica, 'n bolvörmige ruumdje bie ónger anger roufdere die 't middenoear ómvatj. Bieje Feliformia besteitj de bulla tympanica oet twieë kamere, bieje Caniformia slechs oet ein kamer.
Toete Feliformia behuuere de volgendje femieljes:
- Katechtige (Felidae)
- Hyena's (Hyaenidae)
- Mangoeste (Herpestidae)
- Civetkatechtige (Viverridae)
- Madagaskarcivetkatte (Eupleridae)
- Pardelroller (Nandiniidae)
Lejen oet dees óngerorde versjillen in gruuedje vanne toet 28 cm lang en 350 gram zwaor dwergmangoeste (Helogale parvula) toete toet 4 m lang en 280 kg zwaor Siberische tiegere (Panthera tigris altaica). Vief vanne zès femieljes kómmen oearsprunkelik allein in Afrika, Zuud-Europa en Zuud-Azië veur. De Feliformia zeen versprèdj euver alle kóntinente, mit oetzunjering van Australië, Nuuj-Zieëlandj en klein eilenj inne Stillen Oceaan. De Madagaskarcivetkalle zeen de ènsigste landjroufderen op Madagaskar. Ein saort, de hoeskat (Felis catus) is gedomesticeerdj gewaoren en kump euvere ganse werreld veur.
Dees óngerorde wuuertj ouch waal "Katechtige" geneump, meh det kan verwarring oplevere mitte femielje Felidae.