Evangeliste

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Haregarius oet Tours: De veer evangeliste rónd Jezus (ca 850)

Evangeliste zint in 't Nuuj testament en in de vreugchristeleke literatuur luuj, die es zendeling, sóms es helper van de apostele 't evangelie verkóndige. Saer de driede ièw weurt de term ouch gebruuk veur de sjrieversj van 't evangelie.

De 4 autäörsj, die 't leve van Jezus besjrieve heisje: Matheus, Marcus, Lucas en Johannes.

Matheus haet es attribuut de miensj, umdat zien verhaol begint mèt de miensjeleke sjtamboum van Christus.

Marcus weurt aafgebeeld mèt 'ne lièf (lièw), 'n deer oet de woestijn. Zien verhaol begint mèt 't leve van Johannes de Duiper in de woestijn.

Lucas weurt mèt e rund aafgebeeld umdat hae vertèlt van 't offer in de tempel door Zacharias, de vader van Johannes de Duiper.

't Attribuut van Johannes ies de adelaer, want zien weurd kómme tot groate huègde.

Matheus, Marcus en Lucas weure ouch waal synoptici geneump, umdat de opzat en inhoud van hun evangelies väöl op ein lieke.