Embraer
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Embraer, aofgeleid vaan Empresa Brasileira de Aeronáutica, is 'n Braziliaanze vleegmachienbouwer, opgeriech in 1969. Lange tied woort wieneg geproduceerd, 't bedrief kaom pas vaanaof 2 januari 1970 ech vaan de groond. In 1971 begós de fabricaasj vaan 'n zweefvleegmachien, de EMB400 Urupema. Dit woor de ierste vleegmachien wat op de eige fabricaasjfaciliteite vaan Embraer woort gebouwd.
Op 9 augustus 1972 maak de EMB110 Bandeirante zien ierste vlöch. 't Is 'n klein touwstèl mèt twie turbopropmotore veur regionaal gebruuk, en woort ein vaan de efficiëntste touwstèlle op de merret. De ierste lievering voont plaots in 1973 aon de Braziliaanse Lochmach. Pas in 1978 woort 't touwstèl veur de ierste kier gelieverd aon 'n commerciële lochvaartmaotsjappij, 't Franse Air Littoral. In 1974 kump 'n samewèrking mèt Piper, boebij Embraer inkel touwstèlle vaan Piper maag bouwe. Op oktober 1976 vint de ierste vlöch vaan de Embraer 121 Xingú plaots. Dit is 't ierste gemotoriseerde vleegmachien wat door Embraer zelf woort oontworpe. 't Is 'n compac en efficiënt touwstèl oontworpe veur zakeverveur.
In de jaore tachteg woort ouch 'n militair touwstèl oontworpe, dewijl de EMB145 veur 't iers woort oontworpe. De oondertösse verawwerde EMB120 woort daan ouch veurgestèld, gebouwd en gelieverd. In 1990 heet Embraer financiële probleme, boebij 4000 vaan de 13900 personeelslede weure oontslage. In 1994 woort de EMB145 veur d'n twiede kier gelanceerd, dees kier mèt motore aon de start gemonteerd. Op 't ind vaan 'tzelfde jaor woort Embraer geprivatiseerd. In 1995 verandert de fiemele positie vaan Embraer es de Embraer 145 veur 't iers vluig mèt gooj rizzeltaote. 't Is 'n zuineg vleegmachien wat noe, nao de ierste lievering aon Continental Airlines in 1999, euveral op de wereld te zien is.
In augustus 1999 bringk Embraer de EMB170/175/190/195 oet. Dees nui touwstèlle höbbe 'n capaciteit vaan 70 tot 114 steul en 'n vleegbereik vaan naoventrint 3600 km. Dit type völt 't gaat op tösse de regionale jets en de Airbus A318.
