Eechelkaole

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Eechelkaole of tónghanevoot (Ranunculus lingua) is 'n bótterbloom oete ranonkelfemielje (Ranunculaceae). De plantj greutj op zónnige toet lichtelik besjieëmdje plaatse mit nate, (maotig) aetesrieken en döks get kalkhajendjere gróndj of in óndeep, stilstäöndj toet zwaak-struimendj water. Meistes vindj me de plantj in reetlenj, zump, waterkantjen en moorbus. Eechelkaole is betrèkkelik zeldjzaam gewaoren en vindj me allewiel nag waal oppe Kempe.

Eechelkaole is 'n kroedechtige, euverblievendje plantj die 60 toet 120 cm hoeag wuuertj. De plantj greutj van junie toet en mit augustus. De stengel is rechstäöndj, griesgreun en döks roead aangeloupen en haol. De bloomsstele zeen óngegreuf. De reut zeen lank en höbbe lang, haol oetluipers. De ieëste blajer zeen eiróndj, tóngvörmig mit 'ne breie, get hertvörmige voot. De stengelblajer zeen lienvörmig toet lankwirpig en loupe smaal nao d'n toep enne voot. Ze höbbe vriewaal geine steel en zeen lich-getandj. De blome zeen helder glanzendj gael en zeen 2 de 5 cm groeat. De kroeanblajer zeen vlaak-oetgesprèdj; ze staon op lang, vertakdje stele. De vröchte zeen 2,5 toet 3 mm.

Eechelkaole is 'n vergiftigdje plantj.