Äöpen houfmenu

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


'n Dröpke (Nederlandjs borrel) is ein in väöl Limburgse dialekte gebruuk woord veur ein klein glaeske gevöld mèt sjterke drank, meistal mèt eine jónge klaore of sjnaps. 't Glaeske zelf wirt ein dröpkesglaeske geneump.

'n Dröpke wirt in Limburg meistal biej biezunjere gelaegeheje gedrónke en in kleinder hoeväölheje ouch waal op zónjig of op doordewaekse aovende. Veurbeeldje van dit saort gelaegeheje zint verjaordage, trouwpertieje, mèt de kirmes mèr veural mèt awtjaor en op nuujjaorsdaag en dan meistal mèt ein waffel of 'ne aoliebol d'r bie. Vreuger waas 't ouch ein gooj geweunde óm ein dröpke te drènke biej 't sjlachfeës in 't dörp. Allewiel is 't veur väöl luuj veural gebrukelik óm ein dröpke te gebroeke ter aafsjluting van ein biejeinkóms of biej ein receptie, de äöpening van ein acedemisch jaor, biej eine kersborrel of op ein nuujjaorsreceptie.

In vreuger tieje, haw jederein waal ein flesj mèt sjterke drank in hoes. Väöl awwer mansluuj drónke dèks ter aafsjluting van de zjwaore wirkdaag saoves ein dröpke. De dokter sjreef doe waal èns veur óm ein dröpke te numme es medesien veur es me dèks moosj hooste biej ein verkawtheid of es me de griep haw. Ouch woort waal gezag dat me saoves ein dröpke moosj numme ómdat me dao good van koosj sjlaope, veural es me zich èns neet lekker veulde. De angere daag veulde me zich dan weer good en koosj me d'r weer aeve taenge.

Ein typisch Limburgs dröpke is Aelske, ein absinth-alsem (aels) drenkske, ouch waal Els la Vera geneump.

In sómmige Limburgse plaatsje wirt ein dröpke ouch waal ein neutje geneump.

EtymologieBewirk

’t Woord dröpke is aafgeleijd van de Middehoagduutsj tröpfel en Middenederlandjse droppel wat allebei dröppel beteikent. In 't Duutsj is 't woord tröpfele veur oes woord dröppele bekènd en ’t woord Tropfen veur dröppel is ouch nog algemein gankbaar. Oes woord dröpke is dan weer aafgeleijd van dröppelke.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Dröpke&oldid=342970"