Donovaly

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

Donovaly (IPA: /'dɔnɔʋali/; tot 1882: Donoval; Hongaars: Dóval) is e dörp en 'n gemeinte in 't Sjlowaaks distrik Banská Bystrica. 't Plaetske ligk zon 26 km van de houfplaats Banská Bystrica en de sjtad Ružomberok aaf.

't Dörpke Donovaly ligk op 'n heugde van 960 m. De oppervlaakde van de gemeinte is 17,5 km². De gemeinte Donovaly haet 154 inweuners (31 december 2004) en 'n bevolkingsdichheid van 9 luuj/km². De poscode van de gemeinte is 976 39.

Donovaly ligk aan 'ne wichtige bergpaas tösse de Lege Tatra en de Starohorské-heuvele. 't Ligk prónt aan de route van Banská Bystrica nao Ružomberok.

Bezeenswaerdigheje

De plaats göldj es 'n wintjersjportoord. 't Skisezoen doert van november tot ènj meert of begin april. Hie vindj ouch hónjssjleerenne plaats;
De hoezer van de plaats höbbe 'ne grote, glazere veranda en wieke dudelik aaf van de gewuuenlike boewwies in de ómgaeving en teune sterke invleuje vanoet de Alpelenj.

Gesjiechte

De gemeinte óntsting tösse 1618 en 1820 oet zeve wied oeterein ligkendje koempelgehuchskes. Veur 't eers waerde in 1702 sjriftelik de naam Donnovall gebroek. De eerste gehuchskes, dend'rtied Duutsje grunjige, krege de name van de kaolemeisters. De hujige name zeen Donovaly, Hanesy, Sliačany, Mišúty, Mistríky, Polianka en de nao 1808 ingeliefde plaats Buly (Bully). De ómgaeving is bósriek en ane begin van d'n twintjigsten eew waerde de gemeinte 'n toeristische plaats, mit naam door de aanlag van de bergpaas.