Den Uul van den Grauwert (vastelaovesgezèt)
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Vastelaovesgezèt "Den Uul van den Grauwert" is 'n vastelaovesgezèt veur de stad Mofert en ómgaeving. De gezèt weurd oetgegaeve door Karnavalsvereniging "Den Uul Van den Grauwert" oet Mofert.
Gesjiedenis bewirk
Ontstaon van de gezèt bewirk
Op 18 februari 1906 (de zónjig veur de vastelaovendj) waerde de ieërste vastelaovesgezèt "Den Uul van den Grauwert" oetgegaeve. De gezèt waerde oetgegaeve bie gelaegenheid van 'ne historische optoch. De commissie, waat de optoch organiseerde en de vastelaovesgezèt oetgoof weurd gezeen es 't begin van Karnavalsvereniging "Den Uul Van den Grauwert". De meiste stökke oete gezèt waerde vertèldj vanoet 't ougpuntj van d'n Uul van den Grauwert zelf. D'n Uul vertèldje det hae in 'n sjeetgaat van de Grauwert gebaore waas e hae proclameerde zich toet drosserd van Mofert. In ziene praek vertèldje d'r de luuj waat d'r allemaol neet good waas in Mofert en waat hae dach dao-aan te doon.
1923 bewirk
In 1923 waerde de twieëde vastelaovesgezèt "Den Uul van den Grauwert" oetgegaeve, weer bie gelaegenheid van 'ne historische optoch. Eigelik waas 't de bedoeling om dit alles plaats te laote vinje oppe zónjig veure vastelaovendj. Mer door 'ne nag onbekindje raeje zeen de festiviteite oetgestèldj toet 13 mei. De optoch veer doe same mitte oranjefieëste nao aanleiding van 't 25-jaorig ambsjubileum van keuningin Wilhelmina. De opzèt vanne gezèt waas weer 'tzelfde.
1934 bewirk
De derde "Uul van den Grauwert" volgde in 1934. Dit kieër waas 't op vastelaoveszónjig. In dit jaor waerde d'r ouch ne echte vastelaovesoptoch gehaje door 'n aantal leje van voetbalclub SNA. Dit kieër sprook d'n Uul euver 't opkómmende nazisme in Duitslandj. Hae haw dudelik gein hoeag patsj op veur dees broenhaemde.
1950 bewirk
Op 19 februari 1950 waerde veur 't ieërs nao de Twieëde Werreldoorlog "Den Uul van den Grauwert" oetgegaeve. Dit kieër stóng de praek van d'n Uul veural in 't teike van lof veur ederein, dae zich in haet gezat veur de wederopboew van Mofert nao de oorlog.
Vanaaf 1956 bewirk
In 't jaor 1956 waerde veur 't ieërs statute opgestèldj veur Karnavalsvereniging "Den Uul Van den Grauwert". D'r waas vanaaf dit jaor structureel 'ne georganiseerde vastelaovendj in Mofert. Det waas ouch te merke ane gezèt. De vastelaovesgezèt waerde dökker oetgegaeve.
Nao 1991 bewirk
Van 1991 toet noe is "Den Uul van den Grauwert" eder jaor versjene.
De naam bewirk
De naam vanne gezèt is de naam vanne fictieve sjriever vanne gezèt. 't Geit hie namelik óm 'ne uul, dae gebaore is en woont oppe Grauwert. Mitte Grauwert waerde de ruïne van Kestieël Mofert bedoeld.
Inhaad bewirk
"Den Uul van den Grauwert" is altied 'n gezèt gewaes, wo de inhaad belangrieker is es 't uterlik. Mofert steit bekindj óm de get graovere humor es anger dörpe. Det is ouch truuk te vinje inne gezèt. Opmerkinge en waordspelinge, die ethisch net waal of net neet verantjwaord zeen "kónne" in Mofert. Vanwaege 't feit det de redactie neet per se allemaol leje vanne oetgaevende vereiniging zeen, is d'r door de vereiniging 'n cencuurcommissie in 't laeve gerope. Zie toetse de stökke ane "Mofertse moraal" veurdet de stökke nao de drökker gaon. Behalve 't veurwäörd van de vors en de prins, de proclamatie, de advertenties en eventueel 't program besteit de gezèt alein mer oet kolder en sjaele zeiver. D'r is bewust veur gekaoze óm gein foto’s van de veurige vastelaovendj te plaatse.
Vorm bewirk
Sins 1991 is de gezèt gemaak op 'n handjzaam A4 formaat. Toet 2000 waerde alle pagina's op gekleurd pepier gedrök. Óm 't gehieël get röstiger te make is daonao gekaoze veur wit pepier es binnewèrk en 'n gekleurde ómslaag (Gael pepier mit roead, greun en zwart bedrök). Vanaaf 't jubileumjaor 2005 toet nao weurd de ómslaag ane boetekantj full color gedrök.