Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.


Cor Driessen (Heële: * 1914- † 1989) woar inne kunsteneer en sjriever oet Heële.

Cornelius Maximilaan Driessen woar i 1914 geboare i Kirkroa. Wie heë twieë joar aod woar, verhoesde heë mit zieng famielje noa Heële. Doa trouwde heë i 1939 mit Gemma Peereboom (1917-1982). Driessen en Peereboom kreëge same twieë kinger. Driessen góng i Mesjtreech noa de Kunstnijverheidsschool. Later houw heë ónger angere e reklaamburo en ing tekensjoeël i Heële. Doaneëve makde Driessen sjildereie en bilder. Heë is i 1989 gesjtórve i Heële.

Driessen (Limburgs: Kor Driesse) woar i g'n twieëde haofsjeet va d'r 20e ieëw i Heële bekank es sjriever va proza en gedichte op Heëlesj plat. Heë hat óch vasteloavesleedjes gesjrieëve. Driessen hanteerde doabei al vreug zieng ege sjpelling vuur 't Heëlesj. Heë sjreef bevuurbild neet sj, meh sh. 't Woad sjting sjreef d'r Driessen es shting, en Heëlesj es Heëlesh.

Op die sjpelling goof 't kritiek, oet d'r dialekverein Veldeke en va anger sjrievesj oet Limburg. Zie vónge de sjpelling va Driessen te aafwiekend. [1] Driessen, inne boetegeweun principiële miensj, woar 't doa neet mit ins en wool zieng sjpelling neet apasse.

Driessen woar óch inne pionier va d'r Heëlesje vasteloavend. Heë hat neet alling d'r naam, meh óch 't symbool va d'r Heëlesje vasteloavesverein De Winkbülle bedach, inne lachende eëzel. Noa ziene doeëd is e herdinkingsbook oetgegeëve woeëde, Kiezzel, Shting en Brikke, mit gedichte, proza en artikele uëver zieng sjpelling van 't Heëlesj Plat.

Sjtöalke bewirk

Nae, Ug zouw ig neet wille zieë:
zoen kroeën, der septer drage
en shtil te shtoa, neet shpreëke,
noeëts get trük te mage zage?
En agter mig zoen gowe plaat...
Ut kiendje vas te hoate
dát weul ig waal,
mè zouw ut kink zig dat gevalle loate?
Uër kleed mit zienne fiene rank
der mantel blauw en gowe,
die shtònt mig neet
en veule drek i gans verkieëde vouwe.
De oge ummer oape han,
mit wiej en shtil pupille
en noeëts dermit te kniepse òg..?
Nae, dàt zouw ig neet wille.

(Ieësjte deel va zie gedich Beij ut bild van de Mòddergoads, i zieng ege sjpelling[2])

Publicaties bewirk

  • Zoeë shrieve vieër Heëlesh dialekt, Heële 1956.
  • Mosalect Bloemlezing uit de Limburgse dialectliteratuur, Heële 1976, p. 51-53.
  • Kiezzel, Shting en Brikke - Cor Driessen I woad en bild, Heële 1998.

Nuët bewirk

  1. Het levenswerk van Cor. M. Driessen, Een nieuwe toren van Babel, Wim Kuipers, i: De Limburger, 10 september 1988.
  2. Kiezel, Shting en Brikke, Heële, 1998, blz. 137.
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Cor_Driessen&oldid=433963"