Chileens hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Chileens hierevoetbalèlftal vertrejt Chili in internationaol voetbalmatche. 't Land heet 'n aw voetbaltraditie die trökgeit tot de late negentienden iew. 't Èlftal heet door de jaore heer zier wisselend gepresteerd, meh deeg in zien bèste jaore mèt aon de wereldtop. 't Team weurt gereguleerd door de Chileense voetbalboond FFCh, dee is aongeslote bij de CONMEBOL.
Historie bewirk
De FFCh woort al in 1895 opgeriech. In Chili kaom 't voetbal oongeveer in d'nzelfden tied op wie in Argentinië en Uruguay, en e stök ieder es in Brazilië. 't Nationaol èlftal woort in 1910 gestiech; 't späölde zienen ierste match tegen Argentinië (3-1 verlees). In 1916 waor Chili, same mèt Argentinië, Brazilië en Uruguay, ein vaan de stiechtende naties vaan de CONMEBOL; datzelfde jaor späölde de veer èlftalle veur 't iers um 't Zuid-Amerikaans kampioensjap. Ouch op 't ierste Wereldkampioensjap (1930, in Urugay) waor Chili presint. Tege de groete voetbal-len kós 't evels neet op.
Ouch de jaore daonao waor 't land geine groete wereldspeuler. 't WK woort dèks neet gehaold. De bèste prestaties waore twie twiede plaotse in 't continentaol kampioensjap in 1955 resp. 1956. In 1963, op 't WK in eige land, góng 't evels gans aanders. 't Euverleefde 'n poule mèt oonder mie Wes-Duitsland en Italië. In de haaf finaal góng 't oetindelek tege de latere kampioen Brazilië t'n oonder. Nao wins in de troesfinaal tege Joegoslavië woort 't team oetindelek daarde. In de jaore zeventeg góng 't wisselend, in de jaore tachteg euver 't algemein minder. Aon de WK's vaan 1990 en 1994 moch Chili neet mètdoen nao 't Rojas-sjenaol: Chili waor bij 'ne match tege Brazilië vaan 't veld geloupe naotot keeper Roberto Rojas zoegezag door vuurwerk waor geraak; heer bleek dit gesimuleerd te höbbe.
Ouch in de jaore negenteg en de jaore nul veel 't Chileens team neet op. Dit veraanderde midde jaore tien. 'n Generatie speulers die in 't decennium daoveur waor opgestande, kaom noe tot bleuj bij groete Europese clubs. Oonder hun waore Alexis Sánchez (Udinese, FC Barcelona, Arsenal), Claudio Bravo (Real Sociedad, FC Barcelona, Manchester City), Arturo Vidal (Bayer Leverkusen, Juventus, Bayern München) en Eduardo Vargas S.S.C. Napoli, TSG 1889 Hoffenheim). Dit team maakde Chili in 2015 veur 't iers kampioen vaan Zuid-Amerika. Ouch de jubileumeditie 't jaor dao-op wis Chili te pakke.