Bessem
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
'ne Bessem is 'ne groeate bustel aan 'ne steel womit me staof, blajer en anger voel biejein kan kaere.
't Matterjaal wovan 'ne bessem wuuertj gemaak kan versjillig zeen. Aaj besseme bestingen oet biejeingebónje takbus rónjelóm 'ne stek (de steel). Dees saort sliet snel. Dore slietaasj wuuertj d'n óngerkantj vanne bessem vlaak, wodoor me toet in al de klènder heuk kan kaere.
Veur boetebesseme waere tek vanne birk of de reut van smeelj (Molinia caerulea) gebroek; veur binne broekdje me vreuger 't fiender vlaksdotter (Camelina sativa). Ouch gebroekdje me waal brum.
De meis-veurkómmendje modern besseme höbben 'n rechheukige, houtere plank anen óngerkantj, worin vrie graof kónsstof- of klappervezele zeen bevestig. Dees saort aan besseme lieëntj zich good veur 't kaere van plaatse boeten 't hoes. Veur 't kaere van floeren in 't hoes gebroek me fiender besseme, bezatj mit paershaor, verkeshaor of nylon.