Bajkalmaer

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

'n Satellietfoto van 't Bajkalmaer en zien ómgaeving.

't Bajkalmaer of Baikalmaer (Róssisch: Озеро Байкал Ozero Baykal [ˈozʲɪrə bɐjˈkɑl]; Boerjatisch: Байгал нуур Baygal nuur "riek maer") is e maer gelaengen in 't zuje van Siberië, in 't Aziatisch deil van Róslandj, kortbieje grens mit Mongolië. 't Is 't aadste en deepste zeutwatermaer oppe aerd. 't Haet 'n maximumdeepdje van 1.637 maeter en haet zich veur mieër es 25 miljoen jaor trögk gevörmp. De wèskus van 't maer wuuert ómgaeve dore Bajkalberg; 't zuudwèste dore Primorskiberg; 't zuudoeaste dore Chamar-Dabanberg; en 't oeaste dore Bargoezinberg. De lingdje is zoea 640 kilomaeter, mer 't maer is nörges breier es 80 kilomaeter.

't Bajkalmaer haet 'n oppervlaakdje van mieër es 31.720 veerkantje kilomaeter; de waterinhaad, zoea twintjig percent van al 't zeutwater oppe aerd, is zoea groeat det 't veur vief jaor lang de miensjheid van drinkwater kós verzeen. Wen de waterinhaad geliekmaesig euvere aerd woort versprèdj zów dit 'n laog van twintjig centimaeter aan water beslaon. 't Maer bevatj mieë water es alle Naord-Amerikaanse Groeate Maere biejein.

't Water van 't Bajkalmaer wuuert aangevöldj door ruum driehóngerd revere, wovan de Selenga vanoet 't zuje de vernaamste is. De ènsigste reveer die water oet 't Bajkalmaer aafveurtj is d'n Angara. Deze struimp de Jenisej in en mundj dore Karazieë oet innen Arctischen Oceaan. 't Gebied róntjelóm 't Bajkalmaer guldj saer 1996 es werreldirfgood.

'n Bekandje deersaort waat in en róndj 't maer laef is de zieëhóndj de Bajkalrob (Pusa sibirica).