Pyrenesen akkelej

(Doorverweze van Aquilegia pyrenaica)

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


De Pyrenesen akkelej.

De Pyrenesen akkelej (Aquilegia pyrenaica) is 'n euverblievendje plantj oete ranonkelfemielje (Ranunculaceae). Dae is 'n endemische saort veur Franse en Spaanse Pyreneeje enne Cantabrische Berg.

De Pyrenesen akkelej greutj veurnamelik op vöchtige plaatsen op kalksteinbaom, wie graaslenj en puunhellinge, inne subalpien zaon vanne hoeagberg toet op 2.500 m baove zieëspegel.

De bloom vanne Pyrenesen akkelej.

De Pyrenesen akkelej is 'n euverblievendje, kroedechtige plantj, mit 'ne meistes vertakdje, toet 30 cm langen, óngeraan gledden en op baoven aan behaordje bloomsstengel. De gróndjblajer zeen gesteeldj, dóbbeldrietalig, ónbehaordj, mit lienvörmige toet eivörmige blaadslepe. De blome staon in 'n iel troes mit toet drie blome de stengel.

De blome zeen knakkendj toet hangendj, toet 5 cm doorsnit, en viefdeilig. Zowaal de oetgesprèdje kelchblajer wie de inne midde gebunjeldje kroeanblajer zeen helblaw of lilagekluuerdj. De kroeanblajer dragen anen toep e lang, dón, haokvörmig gebaoge spaor. De taalrieke maeldräöj zeen felgael-gekluuerdj en zeen korter es de kroeanblajer.

De plantj bleutj van julie toet augustus.

Zuuch ouch bewirk

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Pyrenesen_akkelej&oldid=417642"