Annemarie Penn

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Johanna Maria (Annemarie) Penn-te Strake (Hèlmoond, 31 juli 1953) is 'n Nederlandse zjuriste. Vaan 2015 tot 2023 vervölde ze de functie vaan börgemeisterse vaan Mestreech.

Leve

Annemarie te Strake greujde op in Deurze (Deurne) es kleinkeend vaan industrieel Lambertus te Strake en börgemeister Lambert Roefs. In häör woenplaots doorleep ze 't Willebrordgymnasium. Nao häör sjaol góng ze rechte studere aon de Kathelieke Universiteit Nimwege, boenao in de jaore tachteg 't raiosjap volgde. Tösse de twie studies door deeg ze oontwikkelingswerk in Malawi. Tijens häör rechtestudie begós ze ouch de Wètswinkel in Deurze.

Ze is getrojd mèt dokter-chirurg Olaf Penn.

Carrièr

Penn kaom te wèrke es rechter aon de arrondissemintsrechbaank in Mestreech. Dao klom ze in 1998 op tot vicepresident. In 2006 veranderde ze vaan loupbaon door hoofofficeer vaan zjustitie te weure. Zès jaor later trooj ze touw tot 't colleesj vaan procureurs-generaol in Amsterdam.

Vaanajds waor Penn neet bij de politiek betrokke, meh häöre maan zaot dao wel in es liestrèkker vaan de Seniorepartij. Oondaanks of daankzij tot ze gei lid vaan n'importe wat veur partij waor, leide ze in 2014 nao de gemeinteraodsverkezinge de formatie in Mestreech. In 2015 kaom ze in beeld es opvolger vaan börgemeister Onno Hoes, dee zien positie door alderlei sjendaole in zie privéleve versjendeleerd waor. Op 23 aprèl droog de raod häör es insegste kandidaot veur. De installatie volgde op 1 juli vaan dat jaor. Penn is d'n ierste vrouweleke börgemeister vaan Mestreech, zoewie d'n ierste partijloeze in langen tied.

Bron

Dit artikel is gebaseerd op 't corresponderend Nederlandstaoleg artikel, en wel in dees versie.