Blaw windjruueske

(Doorverweze van Anemone apennina)

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.


't Blaw windjruueske.

't Blaw windjruueske (Anemone apennina) is 'n lieëg, vaste plantj oete ranonkelfemielje (Ranunculaceae). De plantj kump oearsprunkelik oet Zuud-Europa. In Nederlandj en op 't Belsj kump de plantj veur op besjieëmdje gróndj in loufbus en verwiljerdj in häöf. 't Blaw windjruueske liek väöl op 't Balkanwindjruueske (Anemone blanda), meh versjiltj daovan doordet 't Balkanwindjruueske gein behaordj kroeanblajer haet, de bloomssteel nao de bleuj knaok enne wortelblajer gein gesteeldje slepe höbbe.

De plantj haet 'ne veurkäör nao vöchtige en loeftige gróndj.

De bloom van 't blaw windjruueske.

't Blaw windjruueske wuuertj 10 toet 20 cm hoeag en haet knolvörmige rootstekker. De wortelblajer höbbe kort-gesteeldje slepe. 't Blaw windjruueske bleutj in mieërt en april mit blaw, sómwiel witte of egaal raos, 2 toet 3,5 cm groeate blome. De blome bestaon oet ach toet veertieën, sómwiel toet achtieën, van boete behaordje bloomdèkblajer, die botanisch-gezeen kelchblajer zeen. De helmknuup zeen bleikgael of wit. De bloomssteel is rechstäöndj nao de bleuj.

De vröch is 'n einzäöjige doepvröch. Aan 't zaod zitj 'n elaiosoom.

De plantj kump in 't wildj veur in loufbus op vöchtige, aetesrieke zandj en zenjetige klei.

't Milksaap van 't blaw windjruueske is lichtelik vergiftig, ómdet de stof protoanemonine veurkump in 't saap.

Zuuch ouch bewirk

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Blaw_windjruueske&oldid=418591"