Al-Shabaab
Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Al-Shabaab (Arabisch: الشباب, De Jeug) is d'r naam van 'n islamitische terreurbeweëging i Somalië. De organisatie weëd es terroristisch gezieë durch de VS, Zjwede en Noorweëge en kunt vuur óp de Amerikaanse terreurlies. Ze óntsjtóng i 2004 en maakde bis 2006 es jeugorganisatie deel oet van de Unie van de Islamitische Rechbenk.
De UIR woar 'n gróp va sjariarechbenk, die ó.a. 'ne islamitische sjtaat gebaseerd óp d'r Koran noasjtreefde. Dees organisatie houw in 2006 e groeët deel van 't lank in heng, oeënoa ze 't óch ópnoom teëge de centraal regering i Mogadishu. Dit lukde evvel neet, oeënoa de jeugorganisatie zich aafsjplitsde en wieërgóng ónger d'r naam Al-Shabaab. De beweëging richde höar aanvalle op de Somalische regering, de vreëstróppe van de Afrikaanse Unie, christene boete Somalië en soefi's, lede van 'n islamitische minderheed. Ze bedeende zich doabei va zelfmoardaasjleëg, moardaasjleëg en gewapende uëvervalle.
Gesjat weëd dat Al-Shabaab óngevier 7.000 lede hat. Dat is rilletief wieënig. Ze hat evvel vöal mach, weil 't in de praktiek ging centraal regering i Somalië guëf. De terreurbeweëging hat meugelig beng mit Eritrea, Saoedi-Arabië en de terreurorganisaties Al-Qaeda en IS.