Accra

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Accra is de houfstad van Ghana en ligk anen Atlantischen Oceaan. Mit zoeaget 2 miljoen inwoonders is 't de grótste stad van det landj. Accra is 't politiek en ikkenomisch centrum van Ghana. De wichtigste hanjelsprodukte zeen laevesmiddele, hout, multiplex, textiel, kleier en chemicalië.

Gesjiechte

De oearsprunkelike bewoonders van Accra zeen de Ga's; dees höbben ouch de naam gegaeven aan twieë ómligkendje distrikte: Ga East en Ga West. 't Hujig Accra óntwikkeldje zich toet 'n aanzeenlike plaats rónjelóm Britse en Nederlandjse forte die dao inne zevetieëndjen ieëf geboewdj woorte. In 1877 waerde Accra de houfstad vanne Britse kolonie Goudkus, es d'n opvölger vanne plaats Cape Coast. Naodet 'nen iezerbaan nao de mienen en 't agrarisch achterlandj aangelag waas óntwikkeldje Accra zich toet 't ikkenomisch centrum van Ghana.

Bekiekenswaerdig

In Accra bevinje zich 't nasjenaal museum, de Ghanese akkedemie veure kónsten en weitesjappe, 't nasjenaal arsjief enne centraal bibliotieëk. Vermeljenswaerdig is 't kestieël Christiansborg det inne zevetieëndjen ieëf dore Dene geboewdj is gewore.