Airbus A340

Dit artikel is gesjreve (of begós) in 't Oeals. Laes hie wie v'r mit de versjillende saorte Limburgs ómgaon.

De Airbus A340 is ein passageersvleegtuug mit veer motors. ‘t Toesjtel haetj ein 2-4-2 indeiling mit twee gangpaajer en is dus eine widebody. ‘t Vleegtuug is ontwikkeldj veur lang afsjtenj en väöl passageers. De A340 waerdje tegeliek mit de tweemotorige A330 ontwikkeldj. D’r zeen versjillendje versies van de A340 op de mert. Allereers is dao de -200 versie. De -200 is de kortste versie van de A340 een haetj ein kleiner laajvermoge mer ein groot vleegbereik. De -300 versie haetj eine langere romp en beejtj plaats aan meer passageers. De A340-300 haetj ein kleiner vleegbereik mer ein groter laajvermoge dan de -200. In 1997 ontwikkeldje Airbus twee nuuj toesjtelle: de -500 en de -600. De -500 haetj (net es de -600) ein groot vleegbereik en beejtj plaats aan väöl passageers. De -600 beejtj ein vergeliekbaar capaciteit es de Boeing 747-400. Ein groot versjil is waal det de A340 ein leger brandjsjtofverbroek haetj. Doordet dees toesjtelle eine hele lange romp höbbe, waas Airbus waal genoodzaaktj om ‘t middelste lanjingsgesjtel oet te röste mit veer in plaats van twee wiele. Hiejdoor kan ‘t vleegtuug zwaorder waere belaaje, dink den veural aan de extra brandjsjtof veur det groter vleegbereik.

De A340-200

Gesjiedenis

De A340-200 koos op 1 april 1992 veur de eerste keer ’t lochruim. De eerste vluch van’ne F-WWBA, 't eerste prototype, waas op 1 april 1992 en in januari 1993 vloog ‘t eerste toesjtel ein liendeens veur ‘t Duitse Lufthansa. ‘t Vleegtuug haetj eine kortere romp es de A340-300 maar haetj waal weer ein groter vleegbereik. De A340-300 is in sjtaot om 420 passageers te verveure in ein klasse, biej de A340-200 is det maar 303. Maar de inkele maatsjappiej die dit toesjtel gebroektj, haetj ein inrichting veur ongeveer 260 passageers. De A340-200 waerdje neet ‘t verkoupsucces wo op Airbus gehouoptj haaj. En ‘t bleek det vleegmaatsjappieje meer belangsjtelling hejje veur de A340-300. Ouch wie Airbus twee extra brandjsjtoftanks monteerdje en dit toesjtel probeerdje te verkoupe onger de naam A340-8000, bleef ‘t verkoupsucces oet. Inkele maondje later waerdje de produksie opgesjortj omdet de Europese vleegtuugboewer mit de A340-313X op’pe mert kwaam. Dit toesjtel waas afgeleid van’ne A340-300 maar haaj vriewaal ‘tzelfdje vleegbereik es de A340-200.

Technische gegaeves Airbus A340-200

Lengte: 59,42 m.
Breidte: 60,30 m.
Heugte: 16,83 m.
Max. sjnelheid: Mach 0.86
Vleegbereik: 14.820 km.

De A340-300

Ouch de A340-300 is ein veermotorig verkeersvleegtuug veur de lang afsjtenj. ‘t Vleegtuug is gesjiktj om 375 toet 440 passageers te verveuren euver eine aafsjtandj van ongeveer 11.500 kilomaeter. De meiste maatsjappieje die mit dit type vlege, höbbe ein configurasie wo in plaats is veur 295 passageers. Den is ‘t vleegbereik ongeveer 13.500 kilomaeter.

Gesjiedenis

De eerste A340-300, mit ‘t registratienummer F-WWJH, maakdje häör eerste vluch op 25 augustus 1995. Ach maondj later, op 17 april 1996, waerdje de eerste A340-300 aan Singapore Airlines geleverdj. Ein naodeil van’ne A340-300 is waal ‘t kleiner vleegbereik. Dit waerdje opgevange door de productie van de nuuje A340-313X. Dit type haetj vriejwaal dezelfdje vleegeigenschappe mer haetj weer baeter prestaties es de A340-200 en de A340-300. Daorom koupe de meiste maatschappieje noe natuurlik de A340-313X dae ouch noe nog weurdj geboewdj. De cockpit is vriejwaal ‘tzelfdje es de A330. ‘t Enige versjil is det dees serie veer motors haetj en de A330 serie twee motors.

Technische gegaeves Airbus A340-313X

Lengte: 63,60 m.
Breidte: 60,30 m.
Heugte: 16,83 m.
Max. sjnelheid: Mach 0.86
Vleegbereik: 13.700 km.