Jan Klaassens
- Dit artikel is gesjreve in 't Gelaens. Ómdat 't plaatsgebónge is, maogs doe 't ómzètte nao 't Venloos, es te dit dialek sjpriks.
Jan Klaassens (Venlo, 4 september 1931 - Baarlo, 12 fibberwarie 1983) waas eine Nederlandjse voetballer. Hae sjpeelde es middevelder 57 keër in 't Nederlands voetbalèlftal, kaom 505 keër in 'jt veld es sjpeler van VVV oet Venlo en verdedigde 202 keër de kleure van Feyenoord oet Rotterdam (wovan veërtieën keër in ein Europacupduel). Hiejin wirt hae es Limburger allein mèr euvertróffe door Mark van Bommel.
Carrière bewirk
Klaassens begoosj zien voetbalcarrière es jeugsjpeler biej Venlose Boys, mer hae maakde al sjnel de euversjtap nao VVV. Op 12 december 1948 moch hae es zevetieënjaorige zien debuut make in 't hoagste èlftal van de Venlose club wobiej hae mètein ein vaste plek veraoverde. Es haufsjpeler vörmde hae de moter van de ploog. Mèt VVV wón Klaassens in 1959 de KNVB-baeker. In daezelfde zomer verkoch de club 'm veur eine beheuërlikke transfersöm van 100.000 göjje aan Feyenoord, womit hae groate successe wis te behaole. De club woort in 1961 en 1962 landjskampioen en reikde in 't sezoen 1962/1963 tot de hauve finale van de Europa Cup I, wo-in ze tensjlotte door Benfica woort oetgesjakeld. Toch laog biej VVV zien hart, raeje woroó hae dao in 1964 trukkeërde. Hae sjpeelde d'r nog drie sezoene, óm oetentelik op zaoterdig 29 juli 1967 biej de wedsjtried VVV-PSV aafsjied te numme.
Zien debuut in 't Nederlands èlftal maakde hae op 7 mieërt 1953 taenge Denemarke in eine thoeswedsjtried dae Oranje mèt 1-2 woort verlaore. Klaassens kroog veur zien optraje aevel väöl lof toegezjwejd en woort vanaaf dat duel ummer weer opnuuj geselecteerd. Zoa waas hae aanveurder van 't èlftal dat op 14 mieërt 1956 in Düsseldorf de wedsjtried taenge Wes-Duutsjlandj, de doemalige waereldkampioen, mèt 2-1 wón. Mer eine keër óntbrook hae veur langere tied. Nao de oetsjakeling in de kwalificatie veur |t WK 1962 kosde de roop óm vernujing en verjónging van Oranje 'm zien basisplaatsj. Dao kaom nog biej dat hae op 2 mieërt 1962 nao aafloup van de training biej Feyenoord ein ernstig auto-óngelök kroog wobiej hae ènnigee halswervèlle sjeurde en zös waeke plat op ziene rögk moosj blieve ligke. Vervolges knokde Klaassens zich truk in t eësjte van Feyenoord en daonao ouch weer in Oranje. Op 31 mieërt 1963 waas hae in eine wedsjtried taenge Zjwitserland d'r weer biej, óm vervolges nog ènnige interlands aan zien palmares toe te voge.
Nao zien aafsjied bemeujde hae zich neet of nauweliks nog mèt 't voetbal. Biej 't sjpele van ein partieke tennis kroog hae op zaoterdag 12 fibberwarie 1983 gans ónverwach eine hartaanval en is hae gesjtórve. Later bleek dat hae door 't keihel wirke ónger zien voetballoupbaan ein vergroat hart hej gekrege wat häöm op 51-jaorige laeftied fataal is gewore. Es eërbetoan aan zien groate voetballer drök VVV sins 't sezoen 1996/1997 zien portret aaf op breefpepier, clubcards, posters en sjteit d'r biej 't VVV-sjtadion De Koel saer 15 oktober 2004 ein sjtandbeeld van häöm. Op de Parade in Venlo is nog ein klein tabakswinkelke te vènje dat hae jaorelank exploiteerde. Hiej is saer 2003 ein dependance geäöpend van 't Limburgs Museum, dat in 't Jan Klaassens Museum is ómgeduip. Dit waas èns 't kleinste museum van Nederland.
Clubs bewirk
- 1948-1959: VVV-Venlo
- 1959-1964: Feyenoord
- 1964-1967: VVV-Venlo