Constellation program
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Constellation program is e program vaan de NASA. Oonderdeil vaan 't program is 't oontwikkele vaan ruimtevaartuige um de Space Shuttle te vervaange en astronaute nao de Maon en meugelek zelfs nao Mars te sjikke. Op dit momint is de NASA bezig mèt 't oontwikkele vaan de Ares I-rakèt, 'n rakèt um lui mèt de ruimte in te sjikke. Es oonderdeil daovaan is in 2009 'n tesvlöch gedoon mèt de Ares I-X-rakèt. Later in de planning steit de oontwikkeling vaan de Ares V-rakèt, die bedoeld is um vrach te lancere. Daoneve weure nog 'n aontal ruimtevaartuige oontwikkeld.
't Program woort aongekondeg door president George W. Bush op 14 jannewarie 2004 in 'ne touwspraak.[1]. Deze New Vision for Space Exploration weurt gezeen es 'n antwoord op de ramp mèt de Space Shuttle Columbia, de touwstand vaan de minseleke ruimtevaart en 'n meneer um 't enthousiasme veur ruimteverkinning groeter te make. 't Gaof evels väöl kritiek, oonder aandere tot 't allein mer geld kosde en niks opleverde veur publiek nut. Op 1 fibberwarie 2010 stèlde president Barack Obama veur um 't program te stoppe in verband mèt bezuiniginge, mer dat moot nog weure goodgekäörd door 't Congres.[2] Oondaanks de bezuiniginge weurt wel 6 miljard dollar extra oetgetrokke veur de NASA veur de koumende vief jaor veur aander programme.
Ruimtevaartuige bewirk
Veur 't vervoer vaan de bemanning is de Orion capsule bedoelt, die besteit oet twie deile: een capsule (de Crew Module) zoewie ouch in 't Apollo-tiedperk gebruuk woort, mer daan veur 4 tot 6 astronaute, en 'n Service Module veur de aondrieving. Eder capsule moot zoe'n 10 kier gebruuk kinne weure.
Veur de landing op de Maon is de Altair bedoelt. Deze maonlander is wel vief kier zo groet es de landers in 't Apollo-projek en kin 4 astronaute vervoere. De Altair besteit ouch oet twie deile, 'n landingsdeil mèt 't landinggestèl en 'n crew-deil. De Altair is neet herbruukbaar.
Veur de reis nao de maon moot de Earth Departure Stage of EDS oontwikkelt weure. Deze rakèttrap bestaond oet 'ne rakètmotor en de Altair weurt mèt 'n Ares V-rakèt gelanceerd in 'n baon um de Eerd. De Orion zal via 'n apaarte lancering mèt 'n Ares I-rakèt de EDS oppikke, en mèt de rakètmotor daovaan zal de reis weure veurtgezat.